Македонија

Политичка егзибиција на Софија: Бугарија го избегнува состанокот Радев – Сиљановска Давкова на Самитот на НАТО

Македонскиот премиер Христијан Мицкоски денеска изјави дека Бугарија намерно избегнува билатерална средба меѓу претседателите на двете земји на претстојниот Самит на НАТО во Хаг, заменувајќи го најавениот претседател Румен Радев со премиерот Росен Жељазков. Според него, станува збор за политичка егзибиција од страна на Софија, со која се избегнува директна дебата пред меѓународните партнери.

„Иницијативата за средба дојде од претседателот на Европскиот совет, Антонио Кошта, и ние веднаш ја прифативме. Целта беше двајцата претседатели да седнат на иста маса, фасилитирани од ЕУ и во присуство на генералниот секретар на НАТО и американски претставници, и да ги соочат своите аргументи. Но, наместо претседателот Радев, Бугарија сега испраќа премиер“, рече Мицкоски.

Тој најави дека ќе одржи состанок со претседателката Гордана Сиљановска Давкова, која ќе ја претставува Македонија на Самитот, со цел да се координираат позициите. Премиерот нагласи дека секоја иницијатива за билатерална средба, без разлика дали се работи за претседател или премиер, треба да се прифати, бидејќи Македонија мора да биде проактивна и транспарентна во спорот со Бугарија.

„Проблемот не е во неколку стотини граѓани кои се изјаснуваат како Бугари, туку во системска политика на Софија која се спроведувала со поддршка од домашни квислинзи. За жал, такви имаше и во минатата влада“, посочи Мицкоски.

Тој повтори дека суштината на спорот лежи во обидот за историски ревизионизам и негирање на македонскиот идентитет, наведувајќи дека „се работи за стратегија што со децении се спроведува, а целта е создавање на лажна нарација за настанокот на македонската нација и јазик“.

Мицкоски ја повика ЕУ и НАТО да бидат присутни на евентуалната билатерална средба, додавајќи дека само преку отворен дијалог пред меѓународната заедница може да се разберат вистинските намери на двете страни.

„Можеби ќе слушнеме и нешто ново од бугарска страна. На пример, што се случи со 200.000 Македонци од Западна Бугарија меѓу 1956 и 1965 година“, праша премиерот на заедничката прес-конференција со високата претставничка на ЕУ, Каја Калас.

Од официјална Софија досега нема реакција на предлогот за средба во Хаг.

Македонија

Конгрес на ДУИ: Ахмети со нови барања

Лидерот на ДУИ, Али Ахмети, на Петтиот конгрес на партијата денеска изнесе сет клучни политички барања што, според него, треба да ја гарантираат стабилноста и функционалноста на државата. Во фокусот се избор на Влада со двојно мнозинство, уставни измени поврзани со одлучувањето во Уставниот суд и целосен ветинг на сите јавни функционери во последните три децении, под меѓународен надзор.

Промовирајќи го новиот „Национален договор за напредок“, Ахмети побара воведување на т.н. „извршен Бадентер“, според кој секој иден владин состав ќе мора да ја добие довербата не само од мнозинството пратеници во Собранието, туку и од мнозинството пратеници кои ги претставуваат немнозинските заедници.

Тој истакна дека унитарната држава може да биде стабилна само доколку се темели на доверба и лојалност меѓу сите заедници, нагласувајќи дека двојното мнозинство е механизам што обезбедува инклузивност и политичка рамнотежа.

Во делот на судството, Ахмети предложи законите донесени со Бадентеров принцип во Собранието да не можат да бидат поништени од Уставниот суд без истото двојно мнозинство меѓу уставните судии. Според него, потребни се уставно-правни измени со кои одлуките што ги засегаат правата на немнозинските заедници ќе се носат само со заемна согласност.

Покрај уставните промени, лидерот на ДУИ инсистираше и на темелно „прочистување“ на политичката сцена. Тој побара целосен ветинг за сите носители на јавни функции во изминатите 34 години, вклучувајќи проверка на потеклото на имотот и процесите на приватизација, со јасен меѓународен надзор.

Македонија

Македонските деца сè порано пробуваат цигари и алкохол: Првата цигара на 9 години, алкохол на 13

Резултатите од најновото истражување ЕСПАД 2024, презентирано од Институтот за јавно здравје, покажуваат загрижувачки тренд кај македонските ученици – дел од децата ја запалуваат првата цигара уште на деветгодишна возраст, додека првиот контакт со алкохол најчесто се случува околу 13 години.

Истражувањето било спроведено во 96 средни училишта со повеќе од 2.800 ученици и укажува и на значителен пораст на употребата на електронски цигари. Повеќе од една четвртина од учениците пробале е-цигари, а секој десетти ги користел во изминатиот месец.

Алкохолот останува најраспространета психоактивна супстанца меѓу адолесцентите, при што момчињата почесто пријавуваат рана употреба, интоксикација и тешко епизодно пиење. Речиси третина од учениците првпат консумирале алкохол на 13 години или помлади.

Иако помал обем се регистрира и употреба на седативи без рецепт, канабис и коцкање, овие појави се особено присутни кај машката популација. Надлежните институции предупредуваат дека овие трендови бараат засилени и современи превентивни мерки.

Од Министерството за образование и наука информираат дека училиштата веќе спроведуваат програми за превенција на злоупотреба на психоактивни супстанци, а од оваа учебна година е воведен и изборен предмет за здравствена писменост. Институтот за јавно здравје нагласува дека резултатите од ЕСПАД треба да послужат како основа за подобрување на политиките и заштита на здравјето на младите.

Македонија

АХВ засилено ги контролира детските новогодишни пакетчиња: дел од нив повлечени поради неточни декларации

Во пресрет на новогодишните празници, Агенцијата за храна и ветеринарство (АХВ) спроведе 262 вонредни инспекциски надзори за да ја провери безбедноста на детските новогодишни пакетчиња. Контролите беа извршени во магацини за пакување, маркетите и продавниците кои ги пласираат овие производи.

Поради несовпаѓање на роковите на збирната декларација со поединечните рокови на производите и непотполни декларации, инспекциските служби издадоа 4 решенија за повлекување на пакетчиња од промет. Дополнително, двајца оператори со храна добија наредби за ставање на комплетни збирни декларации на пакетчињата.

Од спроведените 262 инспекциски надзори, не се изречени парични казни и не е поништена ниту една храна како небезбедна. Во споредба со ланската сезона, кога беа утврдени сериозни неправилности како погрешни ознаки, истечен рок на употреба и промени во својствата на производите, годинава се забележани само минимални недоследности кај операторите.

АХВ најавува дека контролните активности ќе продолжат и во наредниот период, особено пред и по новогодишните празници, со цел да се осигура безбедноста на детските пакетчиња.