Република

Коњановски: Мерките за вработување се клучни за задржување на младите во Битола

Во „Кино Манаки“ во Битола денеска беше презентиран Оперативниот план за активни програми и мерки за вработување за 2025 година. Настанот го отворија заменик-министерот за економија и труд, Марјан Ристески, и градоначалникот на Битола, Тони Коњановски, во присуство на претставници од соседни општини, институции и граѓански организации.

Градоначалникот Коњановски истакна дека овие мерки се клучни за задржување на младите во градот, особено во услови кога економската емиграција е сè поизразена. Според него, локалната самоуправа веќе презема конкретни чекори преку поддршка за младински иницијативи, волонтерски и практикантски програми, како и подобрување на инфраструктурата.

„Ова е во иста насока со активностите на локалната самоуправа – да ги задржиме младите, да им дадеме можности за работа, развој и останување тука. Веќе трета година по ред, преку соработка со УКЛО, реализираме платено практикантство за млади студенти, што претставува одлична шанса за нивно професионално насочување“, изјави Коњановски.

Заменик-министерот Ристески посочи дека планот за 2025 година е најобемниот досега, вреден околу 40 милиони евра, и опфаќа широк спектар мерки за сите категории на невработени, со посебен фокус на младите. Отворени се три јавни повици за самовработување, кои се активни до 20 јуни 2025 година.

„Мерките се прилагодени за различни категории – млади до 29 години добиваат до 10.000 евра поддршка, а лица над 29 години добиваат до 7.000 евра. Ова е значителен раст во однос на минатата година“, рече Ристески.

Настанот го организираше Министерството за економија и труд во соработка со Агенцијата за вработување и Агенцијата за поддршка на претприемништвото. Заинтересираните граѓани може да добијат дополнителни информации на веб-страницата на Агенцијата за вработување.

Република

Четири тетовски села утре ќе бидат без струја

Дел од тетовските села Цепчиште, Јажинце, Доброште и Слатино утре, 23 декември 2025 година, ќе бидат без електрична енергија поради планирани прекини во дистрибутивната мрежа.

Според најавата, прекинот ќе трае од 09:00 до 14:00 часот. Во селото Џепчиште без струја ќе останат објекти кои се наоѓаат кон центарот на селото, додека во Јажинце прекинот ќе ги зафати објектите во близина на џамијата. Во Доброште и Слатино без напојување ќе бидат делови од селата, согласно планираните активности.

Од надлежните апелираат граѓаните навреме да ги планираат своите обврски и да преземат потребни мерки за време на прекинот.

Република

Хумана новогодишна акција: Дедо Мраз пристигна на мотор кај децата од „Кочо Рацин“ во Битола

Моторџиите од МК Конзули Битола денеска организираа хумана новогодишна посета во Ресурсниот центар Кочо Рацин во Битола, носејќи го Дедо Мраз на мотор за да им подели пакетчиња на децата.

Настанот помина во празнична атмосфера, исполнета со детска радост, насмевки и искрена возбуда. Од МК „Конзули“ истакнаа дека ваквите моменти се потсетник на вистинската смисла на празниците – хуманост, споделување и грижа за најмладите.

Тие упатија благодарност до вработените во ресурсниот центар за топлиот пречек и посветеноста што секојдневно ја вложуваат во грижата и образованието на децата, најавувајќи дека и во иднина ќе продолжат со вакви хуманитарни активности.

Извор: Апла.мк

Република

Проданоски: Наставата на мајчин турски јазик е темел на културниот идентитет и соживотот

По повод Денот на наставата на турски јазик, градоначалникот на Општина Прилеп, Дејан Проданоски, упати искрени честитки до сите наставници, ученици и образовни работници кои ја негуваат и унапредуваат наставата на мајчин турски јазик.

Тој упати посебни честитки до колективот и учениците од ООУ „Св. Кирил и Методиј“ во село Канатларци, каде што успешно се реализира настава на турски јазик и со голема посветеност се негува јазикот како значаен дел од културниот идентитет.

Проданоски ја истакна важноста од негувањето на мајчиниот јазик и почитувањето на повеќекултурните вредности, нагласувајќи дека мајчиниот јазик е нераскинлив дел од идентитетот, традицијата и културното наследство на секој народ, а неговото почитување придонесува за меѓусебно разбирање, почит и пријателство во мултикултурно општество.

Општина Прилеп, како што беше нагласено, ќе продолжи посветено да ги негува повеќекултурните вредности и да го чува културниот идентитет на сите заедници, вклучително и на турската заедница, со цел создавање подобри услови за изучување и унапредување на наставата на мајчин турски јазик.