Макрон: Франција ќе го брани Израел ако Иран нападне!

Францускиот претседател Емануел Макрон изјави дека Франција е подготвена да го брани Израел доколку Иран го нападне, но ја исклучи можноста за учество во офанзивни операции.

„Ако Иран нападне, Франција – земајќи ги предвид своите капацитети – ќе учествува во одбранбени операции за заштита на Израел“, рече Макрон на прес-конференција, истакнувајќи дека неговата земја се залага за дипломатско решение.

Макрон повика на воздржаност од сите страни поради зголемениот ризик од дестабилизација на регионот и ја нагласи сериозноста на иранската нуклеарна програма, велејќи: „Не можеме да живееме во свет каде што Иран поседува атомска бомба.“

Францускиот лидер објави и дека операцијата „Сентинел“, која штити чувствителни точки во Франција, ќе биде засилена, а безбедноста на француските граѓани и дипломатски мисии во регионот ќе биде приоритет.

Тој додаде дека конференцијата за дво-државно решение за Газа, што требаше да се одржи во Њујорк, е одложена од безбедносни причини, но дека Франција останува решена да го поддржи признавањето на Државата Палестина.