Светот реагира на израелскиот напад врз Иран: Осуди, повици за воздржаност и предупредувања за регионална нестабилност
По израелскиот напад врз Иран, што се случи во петокот, пристигнуваат реакции од целиот свет. Израелските сили извршија напади насочени кон ирански нуклеарни постројки, ракетни фабрики и позиции на високи воени команданти. Иранските медиуми и очевидци јавуваат за низа експлозии, вклучително и во главниот објект за збогатување ураниум во земјата.
Врховниот лидер на Иран, ајатолахот Али Хамнеи, остро реагираше на нападот, нарекувајќи го „злосторство“:
„Ционистичкиот режим изутринава изврши злосторство во нашата сакана земја со своите сатански, крвави раце. Треба да очекува строга казна. Со Божја милост, моќната рака на вооружените сили на Исламската Република нема да ги остави неказнети. Со ова злосторство, ционистичкиот режим си подготви горчлива, болна судбина“, изјави Хамнеи.
Австралиската министерка за надворешни работи Пени Вонг изрази сериозна загриженост:
„Австралија е вознемирена од ескалацијата меѓу Израел и Иран, што ризикува дополнително да го дестабилизира веќе кревкиот регион. Ги повикуваме сите страни да се воздржат од дејствија и реторика што ќе ги продлабочат тензиите. Заканата од иранската нуклеарна и ракетна програма е сериозен предизвик за меѓународниот мир, и затоа неопходни се дијалог и дипломатија“, истакна Вонг.
Премиерот на Нов Зеланд, Кристофер Луксон, го нарече развојот на настаните „непожелен“:
„Ризикот од погрешна проценка е исклучително висок. Регионот не може да си дозволи понатамошна ескалација и нови воени дејствија.“
Од Обединетите нации, портпаролот на генералниот секретар Антонио Гутереш пренесе дека Гутереш е „длабоко загрижен“:
„Генералниот секретар ја осудува секоја форма на воена ескалација на Блискиот Исток. Особено е вознемирен од нападите врз иранските нуклеарни објекти, токму во време кога се водат преговори меѓу Иран и САД за иднината на иранската нуклеарна програма. Ги повикува сите страни на максимална воздржаност и избегнување на подлабок конфликт што регионот не може да си го дозволи.“
Министерството за надворешни работи на Саудиска Арабија исто така реагираше остро, нарекувајќи го нападот „очигледна агресија“:
„Саудиска Арабија ја изразува својата силна осуда на израелскиот напад врз братската Исламска Република Иран, што го нарушува нејзиниот суверенитет и безбедност, и претставува флагрантно кршење на меѓународното право и воспоставените норми.“
