Израелските здравствени установи започнаа со транспортирање на пациенти во заштитени подземни оддели, подготвувајќи се за можни нови одмазднички напади од страна на Иран.
Во Медицинскиот центар „Шеба“, лоциран во предградие на Тел Авив, на видеоснимки се гледаат пациенти како се транспортираат кон утврдени подземни простории. На други снимки може да се забележи медицински персонал како преместува клучна опрема и апарати за интензивна нега.
Од болницата соопштија дека примиле десетици повредени лица поради иранските напади, од кои многумина се здобиле со рани од шрапнели.
Слични мерки на претпазливост се преземаат и во други здравствени установи низ Израел, каде пациентите се преместуваат во засолништа под земја со цел да се намали ризикот од евентуални напади врз болнички објекти.
Техеран во текот на ноќта започна нов бран одмазднички напади, како одговор на израелскиот воздушен удар од петокот, кој според иранските власти бил без преседан и насочен кон клучни нуклеарни и воени објекти. Во нападот, според истите извори, животот го загубиле високи воени функционери и водечки научници од иранскиот безбедносен апарат.
