Скопје

Општина Центар планира да спушти рампа за возилата во Дебар маало: Проектот би траел 6 месеци

Пилот-проектот ќе трае 6 месеци – ако воопшто стартува пред изборите

Дебар Маало наскоро може да стане тест-зона за нов сообраќаен режим. Општина Центар планира ограничување на движењето на возила за време на викендите, со цел да се зголеми безбедноста, редот и квалитетот на животот на жителите.

Проектот ќе се достави до Град Скопје и СВР Скопје за одобрување. Доколку биде прифатен, пилот-програмата ќе трае шест месеци, а во зависност од ефектите и реакциите на граѓаните, може да се продолжи за една година или да прерасне во трајно решение.

Затворена зона од петок до понеделник

Од петок во 18 часот до понеделник во 6 часот влезот ќе биде дозволен само за жители со дозвола. Другите возила ќе можат да влезат, но мора да излезат во рок од 15 минути – во спротивно следуваат казни. Ќе има транзитен сообраќај, но не и паркирање.

Општината планира поставување рампи со електронска контрола, како и безжичен систем со мобилна апликација или бесплатен телефонски број за отворање рампи за жителите. Паркирањето кај Орце Николов, Аминта III, Ленинова и 29 Ноември ќе биде дозволено за посетители.

Проектот ќе се спроведе во три фази

Во првата фаза ќе се воспостави контрола меѓу улиците Орце Николов, Климент Охридски, Партизанска и 29 Ноември, со ограничен влез и контрола преку рампи.

Втората фаза ќе го прошири режимот кон улиците 29 Ноември, Рузвелтова и Дане Крапчев, каде што ќе се постават нови рампи и дополнителна контрола.

Во третата фаза, проектот ќе се прошири кон делови околу Градскиот парк (т.н. Дебар Маало 2), со два затворени сообраќајни круга и нов режим.

Наместо хаос – урбана култура

Општината вели дека целта не е казнување, туку подобрување на квалитетот на живот. Доколку проектот се покаже како успешен, истиот модел би се применил и во други делови како Буњаковец и Капиштец.

Скопје

Николоски: Карпош добива нов урбан лик со реконструкција на над 15 улици

Преку петнаесетина улици ќе се реконструираат во општина Карпош со подршка на Владата. Општината полека ќе го смени урбаниот лик и ќе се развива, истакна вицепремиерот и министер за транспорт Александар Николоски при денешната посета на општина Карпош.

Николоски заедно со градоначалникот Сотир Лукровски извршија увид во реконструкција на ул. Јуриј Гагарин, проект кој се реализира со подршка на Министерството за транспорт, а во заедничка соработка со општината.

“ Ова беше заглавен проект, ова беше проект без разлика што имавме обезбедено средства, не можевме да го реализираме. Откако беше избран за градоначалник, заедно со службите во општината, успееја да ги решат сите предизвици на овој проект, да се решат проблемите и еве веќе се гради и ако се оди добро и не послужи времето до Нова година може да се заврши оваа улица, паркингот зад зградите и да се добие нов урбан лик на овој простор. Сакам да најавам дека дополнително на ова имаме уште еден проект кој се реализира со Светска банка во вредност од над 13 милиони денари, тоа е улицата Петар Чаулев, целосна реконструкција околу 600 метри што дополнително се надевам ќе допринесе за урбаниот развој на општината. На тоа додаваме уште дванаесетина проекти кои што ги резлизираме преку вториот повик на Владата и севкупно имаме значајни проекти за општина Карпош. Тука е и подршката на Владата, мојата лична подршка за дополнителни работи кои треба да ги направиме во Карпош. Со изборот на новиот градоначалник, со неговата напорна работа се гледаат промените и навистина сите имаме желба да помогнеме и да се случуваат убави работи во општина Карпош”-изјави вицепремиерот Николоски.

Скопје

Прекин на електрична енергија денеска во Горно Нерези, Глуво и Мирковци

Регионалниот центар за управување со кризи (РЦУК) информира, повикувајќи се на известување од ЕВН Македонија, дека денес од 9:00 до 15:00 часот ќе има прекин во снабдувањето со електрична енергија за корисниците од неколку населени места.

Прекинот ги опфаќа корисниците од селото Горно Нерези и корисниците од селата Глуво и Мирковци.

Станува збор за планиран прекин, а корисниците се повикуваат на трпение до завршувањето на работите.

Скопје

Жителите на одредени делови од Аеродром денес без вода

Јавното претпријатие „Водовод и канализација“ – Скопје информираше за привремен прекин во водоснабдувањето за дел од корисниците лоцирани на булеварот „АСНОМ“, во населбата Аеродром.

Прекинот, кој започна вечерва во 18:45 часот, е предизвикан од уличен водоводен дефект на цевка со дијаметар Ф100 мм, конкретно кај број 74 на булеварот.

Погодени корисници ќе бидат корисниците лоцирани на булевар „АСНОМ“ од број 70 до број 116.

Екипите на ЈП „Водовод и канализација“ се на терен и работат на отстранување на дефектот. Водоснабдувањето ќе биде нормализирано веднаш по завршувањето на работните активности, за што јавноста ќе биде дополнително известена.