Нетанјаху: Ќе го нападнеме секое иранско упориште – доколку е потребно, повторно ќе ги уништиме нивните нуклеарни капацитети
Израелскиот премиер Бенјамин Нетанјаху порача дека Израел е подготвен да ја нападне „секоја локација и секоја цел“ поврзана со Иран, во контекст на зголемените тензии меѓу двете земји.
„Нанесовме сериозен удар врз клучниот ирански објект за збогатување ураниум. Ако биде потребно, повторно ќе го нападнеме“, изјави Нетанјаху во видео-порака објавена денеска.
Тој додаде дека Израел се соочува со сериозна закана од балистички проектили и нагласи дека неговата земја презела конкретни чекори за да ги неутрализира иранските капацитети за нивно производство.
Во раните утрински часови на петокот, 13 јуни, израелските сили извршија воздушни напади врз територијата на Иран, насочени кон нуклеарни и ракетни капацитети. Според ирански извори, во нападите загинале повеќе од 104 лица, меѓу кои високи воени команданти и истакнати научници, додека речиси 380 лица биле повредени.
Истиот ден, Техеран возврати со ракетни удари врз повеќе цели низ Израел. Во иранската одмазда, загинаа три лица, а повеќе од 170 беа повредени.
Размената на удари продолжи и во текот на петокот и саботата, со што конфликтот добива сè пошироки безбедносни и геополитички димензии.
