Односот меѓу американскиот претседател Доналд Трамп и технолошкиот милијардер Илон Маск добива нова димензија, со потенцијал да прерасне во судир меѓу политичките амбиции и бизнис интересите. Според информации на агенцијата „Ројтерс“, администрацијата побарала од Пентагон и НАСА да спроведат ревизија на високо вредни договори со компанијата SpaceX, проценети на над 22 милијарди долари.
Иако формално станува збор за „стандардна процедура“, четворица неименувани извори упатени во процесот тврдат дека зад барањето стои намерата на Трамп да го остави отворено прашањето за можна одмазда кон Маск. Истите извори наведуваат дека целта е да му се овозможи на Трамп простор за брза реакција доколку политичкиот судир со Маск дополнително ескалира.
Тензиите меѓу двајцата започнаа со несогласувања околу федералниот буџет, иако во минатото соработуваа – Маск дури раководеше со Одделот за намалување на трошоци и ефикасност на владата (DOGE) во администрацијата на Трамп. По краткотрајно затишје, односите повторно се влошија.
Говорејќи неодамна од претседателскиот авион „Ер Форс Уан“, Трамп изјави дека „сите владини договори со Маск ќе бидат прегледани“, оставајќи простор за можен политички притисок. Од Белата куќа за „Ројтерс“ изјавија дека станува збор за „строга анализа на постоечките договори“, додека НАСА информира дека продолжува да соработува со индустриските партнери за реализација на претседателските цели. SpaceX и Пентагон засега не даваат коментари.
Некои аналитичари предупредуваат дека политизирањето на договорите со технолошките компании може да има сериозни последици – не само по американската одбранбена стратегија и вселенската програма, туку и по инвестиционата клима во земјата. Посебно чувствителна е улогата на SpaceX во новиот систем за ракетна одбрана, каде секоја негова маргинализација би можела да ги отвори вратите за конкуренцијата и да го наруши тековниот напредок на проектите.
Останува отворено прашањето – дали Трамп навистина е подготвен да ги жртвува стратешките интереси на САД за лична пресметка со Маск, или станува збор за уште една политичка офанзива во пресрет на неговиот повраток на големата сцена?
