Свет

Аналитичар за CNN: Иранските ракети пробиваат се повеќе слоеви на израелската противвоздушна одбрана

Иранските ракетни напади врз Израел, кои не стивнуваат со денови, укажуваат на тоа дека и покрај тешките загуби во раководниот кадар, Техеран успева брзо да се прегрупира и продолжи со офанзивата. Тоа го оцени Трита Парси, политички аналитичар и потпретседател на американскиот Quincy Institute for Responsible Statecraft, во изјава за CNN.

„Израелците очигледно ја потценија способноста на Иран за брза реорганизација, откако со првичниот напад успеаја да елиминираат дел од врвниот воен кадар на иранската армија“, вели Парси.

Тој додава дека Тел Авив верувал оти го „парализирал иранскиот команден ланец“, но случувањата на терен говорат поинаку. „Она што го гледаме сега е дека иранските ракети успешно ги пробиваат сите слоеви на израелскиот повеќеслоен противвоздушен систем“, истакнува аналитичарот.

Според него, развојот на настаните демонстрира сериозна оперативна подготвеност и технолошки капацитети на иранската страна, кои биле потценети од страна на израелските разузнавачки служби.

Во меѓувреме, борбите продолжуваат со несмален интензитет. Во најновиот напад извршен во раните утрински часови врз централниот дел на Израел, загинаа четири лица. Во болничките установи се примени вкупно 87 повредени, од кои едно лице – жена на возраст од 30 години – е со тешки повреди на лицето, петмина се со умерени повреди, а останатите 81 лице се здобиле со полесни повреди.

Quincy Institute, од каде доаѓа Парси, е независен тинк-тенк во САД кој застапува умерена и одговорна надворешна политика, со акцент на дипломатско решавање на конфликти и избегнување на долготрајни воени ангажмани. Нивната идеолошка основа е дека мирот треба да биде правило, а војната – редок исклучок.

Свет

Лекарите во Англија стапија во петдневен штрајк

Лекарите во Англија денес започнаа петдневен штрајк поради несогласувања околу платите и условите за работа, јавува Ројтерс.

Станува збор за помладите болнички лекари, познати како „жители“, кои тврдат дека нивните плати во последните години значително се намалиле и дека работат под зголемен притисок и во тешки услови.

Владата, од своја страна, соопшти дека нема фискален простор за значителни покачувања на платите и дека штрајковите се неодговорни, нагласувајќи ја потребата за заштита на здравствениот систем и пациентите.

Свет

Вашингтон најавува нов притисок врз Москва преку енергетски санкции

САД подготвуваат нов пакет санкции насочени кон рускиот енергетски сектор, со цел дополнително да го зголемат притисокот врз Москва доколку рускиот претседател Владимир Путин одбие да прифати можен мировен договор со Украина, објавуваат странски медиуми повикувајќи се на информирани извори.

Според истите извори, меѓу мерките што се разгледуваат е и таргетирање на бродовите од руската флота на нафтени танкери, како и санкционирање на трговците и посредниците кои учествуваат во олеснување на трансакциите поврзани со извозот на руска нафта.

Изворите наведуваат дека станува збор за опции кои сè уште се во фаза на разгледување, а конечната одлука ќе зависи од развојот на дипломатските напори поврзани со војната во Украина.

Според најавите, новите санкции би можеле да бидат објавени уште во текот на оваа недела.

Свет

Мелони: Европа губи време поради внатрешна слабост и бавни одлуки

Италијанската премиерка Џорџа Мелони изјави дека Европската Унија се соочува со сериозни предизвици, предупредувајќи дека најголемата закана за Унијата не доаѓа однадвор, туку од нејзината сопствена неодлучност и неспособност навреме да носи клучни одлуки.

Говорејќи пред пратениците во Долниот дом на италијанскиот парламент, Мелони нагласи дека актуелниот геополитички момент бара прагматичен пристап, ослободен од идеолошки догматизам. Според неа, токму таквиот пристап е неопходен за соодветен одговор на новата безбедносна стратегија на Соединетите Американски Држави.

„Бесмислено и штетно е да се напаѓаат имагинарни непријатели. Вистинскиот проблем е нашата неспособност да изнаоѓаме конкретни и одржливи решенија“, истакна Мелони во пресрет на претстојниот Самит на ЕУ.

Премиерката се осврна и на прашањето за користење на замрзнатите руски средства за поддршка на Украина, оценувајќи дека станува збор за сложен процес кој мора да биде заснован на цврста и правно издржлива основа. Таа ја повтори поддршката на Италија за Украина и ставот дека Русија треба да ги сноси трошоците за војната, но додаде дека Москва поставува, како што рече, „неразумни“ услови во рамките на мировните напори поддржани од САД.

Мелони упати критики и до предлог-буџетот на Европската комисија за периодот 2028–2034 година, оценувајќи дека во сегашната форма е неприфатлив за Италија. Таа посочи дека документот предвидува зголемени финансиски придонеси, но намалени средства за политики кои се од клучно значење за земјата, како заедничката земјоделска и кохезиската политика.

„Нема да прифатиме да плаќаме повеќе, а да добиваме помалку“, порача италијанската премиерка.