Економија

Две фирми поврзани со Заеви први одбиени да произведуваат електрична енергија

Регулаторната комисија ги одби енергетските проекти поврзани со семејството Заеви

Две струмички компании блиски до семејството Заеви – „Соар Енерџи Груп“ и „Ековат – Груп“ – не добија одобрение за започнување со производство на електрична енергија, и покрај тоа што ги поминале сите претходни институционални филтри, покажуваат податоци од Регулаторната комисија за енергетика (РКЕ).

Барањата на компаниите за доделување привремена лиценца беа одбиени на крајот од мај, иако биле поднесени уште минатата година со комплетна документација, а во меѓувреме биле земени високи кредити и набавена опрема.

„Соар Енерџи Груп“ – сопственост на „Тотал Инженеринг“ на Вице Заев и „Бобан Заев Холдинг“ – планирала производство на електрична енергија од три фотоцентрали во Валандово, со вкупна инсталирана моќност од околу 24 мегавати. Финансиската изложеност на компанијата во моментов изнесува 6,5 милиони евра, а ланските обврски достигнале 8,5 милиони евра.

„Ековат – Груп“ инвестирала во три фотоцентрали во селото Сушица, општина Ново Село, со вкупна моќност од 10 мегавати. Според финансиските податоци, лани направила расходи од половина милион евра, а обврските изнесувале околу 14 милиони евра. Сопствеништвото е поврзано со Симеон и Горан Крстеви – познати бизнис-соработници на семејството Заеви, а во структурата индиректно учествуваат и бугарските фирми „Грал“ и „Зунче“.

Од РКЕ за медиумите изјавија дека барањата на двете компании биле одбиени затоа што технички не било возможно приклучување на нивните капацитети на електродистрибутивната мрежа, поради потребата од претходна надградба на трафостаниците во регионот.

„РКЕ ги одби барањата за привремени лиценци бидејќи не е реализиран условот за приклучување на електродистрибутивната мрежа. Според решението за согласност, мора прво да се изврши надградба на соодветните трафостаници“, соопштија од Регулаторната комисија.

Од таму нагласуваат дека нивната одлука е конечна, но на компаниите им останува можноста да покренат управен спор пред суд. Дополнително, посочија дека поднесените барања за привремена лиценца се веќе несоодветни според новиот Закон за енергетика, кој не предвидува ваков тип лиценци.

„Ако се подобрат техничките услови и се заврши надградбата на мрежата, друштвата може да поднесат нови барања за пробна или трајна лиценца“, додаваат од РКЕ.

Познавачите на состојбите во енергетскиот сектор коментираат дека доделувањето на привремена лиценца е вообичаена постапка пред да се одобри трајна лиценца, која најчесто следи по шест месеци. Засега, од ЕВН Електродистрибуција нема одговор за конкретните услови за приклучување на двата проекта.

Економија

Со НЛБ Банка сега можеш сè! Сите банкарски услуги во твојот телефон

НЛБ Банка ја заокружува јубилејната година со најголемиот исчекор во дигитализацијата на своите услуги и официјално станува првата „mobile first“ банка на пазарот, овозможувајќи сеопфатно дигитално искуство преку мобилен телефон.

Со пораката Што ако можеш сè?, во изминатава година, НЛБ Банка ја градеше својата позиција на поддршка на амбициите и можностите на клиентите. Денес, таа порака ја добива својата најсилна завршница. Сега можеш сè! е слоганот кој ја затвора јубилејната година за НЛБ Банка и јасно кажува дека ветувањето е целосно исполнето.

Поставувајќи нови стандарди и редефинирајќи го банкарството на македонскиот пазар, НЛБ станува првата банка на пазарот чија дигитална платформа за физички лица овозможува банкарство „од почеток до крај“ и во која сите банкарски услуги се достапни преку мобилниот телефон.

Сега клиентите, преку мобилниот телефон, можат да отворат и банкарска сметка. По активирање на мобилното банкарство, веднаш да ја добијат својата платежна картичка во дигитална форма, да ја додадат во дигитален паричник и да ја користат за плаќање на ПОС терминали, онлајн, како и за подигнување на готовина од банкомати.

Преку својот мобилен телефон, клиентите можат да отворат и депозит, да активираат дозволено пречекорување, да аплицираат за добивање на картичка или да зголемат лимит на истата, да аплицираат за кредит. Практично, да управуваат со сите свои финансии, со исклучителна удобност и флексибилност.

„Со воведувањето на „mobile first”, ја заокружуваме јубилејната година и логично го надградуваме слоганот „Што ако можеш сè?” со неговата финална и најконкретна форма – „Сега можеш сè”. Ова не е само комуникациска порака, туку резултат на континуирана стратешка трансформација насочена кон дигитализација, ефикасност и подобрено корисничко искуство.”– истакнуваат од НЛБ Банка.

Со оваа трансформација, НЛБ за своите клиенти-физички лица, веќе нуди комплетен спектар на банкарски производи и услуги 100% дигитално, елиминирајќи ја потребата од посета на експозитура.

„Како прва банка на пазарот што овозможува целосно дигитален пристап до сите клучни банкарски производи и услуги, ја потврдуваме нашата заложба да бидеме банка- иноватор, и да им обезбедиме на клиентите сигурно, едноставно и достапно банкарство, целосно усогласено со современиот начин на живот.” – заклучуваат од Банката.

Економија

Над 250 килограми риба пуштени во акумулацијата „Стрежево“ за одржување на биолошката рамнотежа

ЈП „Стрежево“ успешно го реализираше порибувањето на акумулацијата „Стрежево“ на локацијата брана Стрежево, со внесување на над 250 килограми рибен подмладок од видот крап. Активноста е спроведена во согласност со важечката Риболовна основа и договорот за користење на риби и други водни организми, склучен меѓу Владата на Република Македонија и ЈП „Стрежево“.

Рибата е еден од најдиректните индикатори за квалитетот на водата, а ваквите активности придонесуваат кон одржливо управување со рибниот фонд и зачувување на биолошката рамнотежа во акумулацијата.

ЈП „Стрежево“ останува посветено на заштита на животната средина и одговорно управување со природните ресурси, со цел обезбедување здрави и одржливи водни екосистеми.

Економија

Индустријата за виски во криза

Јапонскиот гигант „Сантори Глобал Спиритс“ објави дека главната фабрика за виски бурбон „Џим Бим“ во Кентаки ќе го запре производството во текот на следната година. Компанијата соопшти дека периодот ќе го искористи за инвестирање во подобрувања на фабриката, но одлуката е делумно мотивирана и од намалената продажба во Канада и неизвесноста предизвикана од трговските политики на американскиот претседател Доналд Трамп.

Останатите објекти на „Џим Бим“ низ САД, вклучувајќи ги посебната дестилерија, објектите за флаширање и складирање, ќе продолжат со работа следната година. Центарот за посетители во Кентаки исто така ќе остане отворен. Вработените во главната фабрика, каде работат околу 1.000 лица, ќе бидат на одмор додека трае прекинот во производството.

Здружението на дестилерии од Кентаки (KDA) соопшти дека количината на бурбон во магацините низ целата држава достигна рекордно ниво од повеќе од 16 милиони барели. Американските дестилерии се соочија со одмазднички увозни царини откако САД воведе такси за увозот на стоки од повеќето земји, а трговските тензии со Канада дополнително го намалија извозот на американски жестоки пијалоци.

Компанијата нагласува дека прекинот на производството е привремен и дека целта е да се прилагодат капацитетите на фабриката на тековната побарувачка и пазарните услови.