Во текот на ноќта продолжија нападите меѓу Израел и Иран, со употреба на ракети и беспилотни летала. Сирени за воздушна опасност се огласија во Тел Авив и неколку други израелски градови, принудувајќи ги граѓаните да побараат засолниште.
Израелскиот премиер Бенјамин Нетанјаху на третиот ден од воздушните операции изјави дека „Техеран гори“, додавајќи дека САД даваат значајна поддршка под раководство на претседателот Доналд Трамп. Тој нагласи дека израелските сили не ги таргетираат цивилите, но дека иранската страна, за разлика од нив, напаѓа населени места.
Од другата страна, иранскиот претседател Масуд Пезешкијан ги осуди нападите на Израел извршени преку ирачкиот воздушен простор и побара од Багдад да ја зајакне граничната и воздушната безбедност. Иранската војска упати предупредување до Израел, барајќи итно повлекување од окупираните територии.
– Напуштете ги окупираните територии, тие нема да бидат безбедни за вас. Иранскиот одговор ќе биде сѐопфатен и разорен – изјави портпаролот на иранската армија, полковник Реза Сајад.
Напнатоста во регионот ескалираше по ненадејните израелски воздушни напади врз ирански нуклеарни и воени објекти во петокот, при што загинаа неколку високи ирански генерали и научници.
Паралелно со воените случувања, во Алберта, Канада се одржува Самитот на Г7. Освен лидерите на седумте најразвиени држави, присутни се и претставници на Европската Унија и други поканети светски лидери, меѓу кои и украинскиот претседател Володимир Зеленски, кој треба да се сретне со американскиот претседател Доналд Трамп.
Претседателката на Европската комисија Урсула фон дер Лајен изјави дека Иран останува главен извор на регионална нестабилност и нагласи дека дипломатско решение е единствениот одржлив пат за справување со нуклеарната програма на Техеран.
Австралискиот премиер Ентони Албанезе порача дека неговата земја издаде препорака „да не се патува“ за Израел и Иран, додавајќи дека заканата од нуклеарно оружје мора да се решава преку дијалог и дипломатија, заедно со меѓународните партнери.
