Европската комисија претстави сеопфатен пакет мерки за унапредување на одбранбената подготвеност на ЕУ, кој треба значително да ја скрати бирократијата, го поедностави пристапот до финансирање и ја поттикне заедничката јавна набавка на воена опрема.
„Со овој пакет за одбранбена подготвеност испраќаме јасен политички сигнал – Европа ја сфаќа одбраната сериозно“, изјави Хена Виркунен, потпретседателка на Комисијата задолжена за технолошки суверенитет, безбедност и демократија.
Клучна новина е воведување на рок од максимум 60 дена за одобрување на дозволи за одбранбени проекти. Доколку државните институции не одговорат навреме, дозволата автоматски се смета за одобрена. Дополнително, се предлага воспоставување на еднообразни контакт-точки за одбранбената индустрија во секоја земја-членка, како и олеснување на процедурите во рамките на Европскиот одбранбен фонд (EDF).
Покрај тоа, се разгледуваат измени на правилата поврзани со конкуренција, животна средина и хемикалии, со цел да се прилагодат на потребите на одбранбениот сектор. Проектите ќе добијат и полесен пристап до финансии преку програмата InvestEU.
Потпретседателот на Комисијата, Валдис Домбровскис, предупреди дека руската воена индустрија забрзано се развива, и дека во рок од 3 до 5 години Русија би можела да биде подготвена за потенцијален напад врз членки на НАТО или ЕУ.
„Не сакаме да звучиме алармантно, но мораме да дејствуваме одговорно. Нашата сила е најдобра одбрана. До 2030 година мора повторно да изградиме кредибилна одбранбена моќ на Европа“, истакна Домбровскис.
Новите мерки се дел од пошироката стратегија на Унијата за гарантирање на безбедноста во услови на зголемени геополитички тензии, особено со оглед на војната во Украина и растечките закани долж источната граница на континентот.
