Балкан

Хрватска сака да стане европски лидер во производство на мали дронови

Хрватска има амбиција да се позиционира како водечка европска сила во производството и испораката на мали беспилотни летала, изјави министерот за одбрана Иван Анушиќ за време на официјалната средба со францускиот министер за одбрана Себастиен Лекорњу, која се одржа во Париз.

Средбата се случи на маргините на меѓународниот саем за воена техника и вооружување, каде двајцата министри ја потврдија одличната одбранбена соработка меѓу Хрватска и Франција.

Во рамки на посетата на Лекорњу на Хрватска, планирана за септември, се очекува финализирање на договорот за набавка на 18 хаубици „Цезар“ (Caesar), со целосен пакет што вклучува обука, техничка и логистичка поддршка за хрватската армија.

– Со ова ги продолжуваме интензивните активности за опремување и модернизација на вооружените сили на Хрватска, изјави Анушиќ.

Тој додаде дека Хрватска се стреми да стане значаен производител на мали дронови, во согласност со европските иницијативи за јакнење на домашната одбранбена индустрија. Францускиот министер го поздравил интересот и потенцијалот на хрватските компании во оваа сфера, најавувајќи дека при неговата посета ќе ги посети производствените капацитети.

Анушиќ се заблагодари за поддршката што Франција ѝ ја пружа на Хрватска во процесот на модернизација на армијата, особено по набавката на борбените авиони „Рафал“.

Идната недела во Хаг ќе се одржи самит на НАТО, на кој се очекуваат нови одлуки за зголемување на трошоците за одбрана. Анушиќ нагласи дека Хрватска е свесна за потребата од посилни инвестиции во безбедноста.

– Оваа година ќе го постигнеме целното ниво од 2 отсто од БДП за одбранбени трошоци, а до 2027 планираме тоа да го зголемиме на 2,5 отсто, со цел до 2030 година да достигнеме 3 проценти од БДП, најави хрватскиот министер.

Балкан

Грција ја поддржува европската перспектива на Западен Балкан како вложување во регионална стабилност

Грција ја гледа иднината на Западен Балкан во Европската унија и ја поддржува европската перспектива на земјите од регионот, но под услов да се исполнуваат критериумите за членство, особено добрососедските односи и почитувањето на меѓународните договори. Според грчки владини извори, проширувањето на ЕУ се смета за инвестиција во безбедноста и стабилноста на регионот, но процесот е тежок и бара реформи и усогласување со пристапните предуслови.

Во пресрет на Самитот ЕУ-Западен Балкан во Брисел, на кој ќе учествува грчкиот премиер Кирјакос Мицотакис, грчките извори истакнуваат дека клучни теми ќе бидат и последните случувања во Украина, финансиските потреби на земјите за периодот 2026-2027 година, повеќегодишната финансиска рамка, како и прашања поврзани со гео-економијата и конкурентноста на ЕУ.

Балкан

БиХ ја зголеми максималната возраст за воена служба на 45 години

Горниот дом на Парламентот на Босна и Херцеговина, познат како Дом на народите, денеска едногласно ги усвои измените на Законот за служба во вооружените сили. Со овие измени, максималната возраст за професионална воена служба се зголемува од 40 на 45 години, под услов војниците да ги исполнуваат психофизичките барања и потребите на службата.

Законот беше разгледан на вонредна седница и предложен од делегатот Џемал Смаиќ. Во образложението, Смаиќ нагласи дека вооружените сили на БиХ се соочуваат со сериозен недостиг на персонал, поради што продолжувањето на старосната граница е неопходно за одржување на оперативните способности на армијата.

Според него, оваа мерка ќе овозможи подобра искористеност на постојниот кадар и ќе придонесе за стабилноста на одбранбениот систем. Новите измени овозможуваат подолг професионален ангажман на војниците, без да се менуваат строгите стандарди за физичка и психичка подготвеност.

Балкан

25 килограми злато и 55 килограми сребро исчезнаа од судско депо

Истанбул – Во депото на Судот во истанбулскиот кварт Бујукчекмеџе исчезнале 25 килограми злато и 55 килограми сребро, чија вкупна вредност се проценува на над 147 милиони турски лири, или околу три милиони евра. Судските службеници на почетокот на месецот забележале дека еден од нивните колеги долго време е отсутен, по што било констатирано недостигот на благото.

Турското обвинителство веднаш започна истрага, при што е утврдено дека главниот осомничен за исчезнувањето заминал за Лондон, во придружба на неговата сопруга, за која исто така е распишана потерница.

Случајот ја разбуди јавноста во Турција, а властите продолжуваат со напори да ги пронајдат осомничените и да го повратат одземеното злато и сребро.