Неколку дена по почетокот на израелските напади врз Иран и неговиот нуклеарен програм, високите израелски официјални лица ја чекаат одлуката на американскиот претседател Доналд Трамп дали САД ќе се приклучат во операцијата.
„Чекаме одлука од претседателот“, изјави еден висок израелски функционер за CNN. Американските и израелските власти интензивно разменуваат информации за текот на израелските воени операции и за можноста за учество на САД.
Сепак, според два извори, премиерот Бенјамин Нетанјаху засега не побарал директно од Трамп да одобри американски удари врз Фордоу – иранско нуклеарно постројување лоцирано длабоко под планината.
Нетанјаху и други израелски претставници се надеваат дека Трамп сам ќе донесе одлука без да се чувствува притиснат од Израел.
„Целата операција се темели на претпоставка дека САД во одреден момент ќе се вклучат“, додаде трети израелски функционер.
Израел инсистира дека има и други начини за уништување или барем привремено онеспособување на постројката во Фордоу, но признаваат дека нема опција толку ефикасна како американските стратешки бомбардери со бомби за пробивање бункери од 13.600 килограми.
