Кина остро го критикуваше американскиот претседател Доналд Трамп, обвинувајќи го дека дополнително ги влошува тензиите меѓу Израел и Иран. Пекинг повика на итна деескалација и предупреди дека „фрлањето масло на огнот“ само ќе доведе до поширок конфликт.
Кинескиот претседател Си Џинпинг изјави дека е длабоко загрижен од израелските воени акции против Иран, кои довеле до ненадејна ескалација на Блискиот Исток. Тој истакна дека Кина се противи на секое прекршување на суверенитетот на други земји и повика сите страни да работат на смирување на ситуацијата.
Израел минатата недела започна масовни напади врз ирански цели, наводно за да го спречи развојот на нуклеарно оружје. Иран возврати со балистички проектили и дронови, при што досега загинале најмалку 24 лица во Израел и над 220 во Иран, според официјални податоци.
Во меѓувреме, Трамп повика на итна евакуација на Техеран, што Пекинг го оцени како провокација. Кинеското министерство за надворешни работи соопшти дека „притисокот и заканите не се решение“.
Кинеските амбасади во Иран и Израел денеска ги повикаа своите државјани итно да ги напуштат двете земји, користејќи гранични премини кон Турција, Јордан, Ерменија и Туркменистан.
