Велика Британија заедно со сојузниците од групата Г7 наскоро ќе објават нов пакет санкции против Русија, со цел дополнително да се зголеми притисокот врз Москва поради војната во Украина, објави британската влада.
Премиерот Кир Стармер се очекува да го финализира пакетот мерки и да нагласи дека сака да соработува со сите партнери од Г7 во нивната заедничка намера.
Целта на санкциите е да се исушат приходите на Русија од енергетскиот сектор и да се намалат средствата што се користат за финансирање на војната.
Од почетокот на руската инвазија во Украина во 2022 година, Велика Британија веќе санкционираше повеќе од 2300 поединци, субјекти и бродови.
„Сега е вистинскиот момент да го зголемиме економскиот притисок и да му покажеме на претседателот Владимир Путин дека во неговиот и во рускиот интерес е да се постигне мир“, се очекува да изјави Стармер.
