Владата и Министерството за образование и наука обезбедија 50 милиони денари за 1.570 стипендии наменети за ученици што ќе се запишат во дуалните паралелки во учебната 2025/2026 година. Секоја стипендија изнесува 3.500 денари месечно и ќе се исплаќа во текот на девет месеци.
Од Владата велат дека мерката е дел од напорите за унапредување на квалитетот на средното стручно образование и е насочена кон намалување на невработеноста и зголемување на практичните вештини кај младите.
Во спроведувањето на практичната обука ќе бидат вклучени 550 компании од реалниот сектор, кои ќе им овозможат на учениците практично искуство и подобра подготвеност за вработување по завршувањето на средното образование.
„Создаваме кадри што ќе бидат подготвени за пазарот на труд, со што директно ја намалуваме невработеноста и ги охрабруваме младите да ја градат својата иднина во Македонија“, се наведува во владиното соопштение.
