Економија

ПАРИ: Вистината зад големиот енергетски прекин во Шпанија

Големиот прекин на електрична енергија што ја погоди Шпанија на 28 април годинава, на кој многумина во првите часови гледаа со сомнеж во можен сајбер напад, доби официјално објаснување. Според најновиот извештај презентиран пред Советот на министри од потпретседателката и министерка за еколошка транзиција Сара Агесен, колапсот на електричната мрежа бил резултат на низа технички дефекти и непредвидени реакции во системот, а не на злонамерен упад.

Истрагата, која се водеше под надзор на Националниот комитет за кризни ситуации со електрична енергија, утврди дека настанот имал сложено и повеќеслојно потекло. Првичната нестабилност започнала во точно 12:03 часот, кога се појавиле невообичаени осцилации на фреквенцијата што достигнале 0,6 Hz и траеле повеќе од четири минути. Иако операторот на системот веднаш реагирал со мерки за стабилизација, како ограничување на енергетските текови кон Франција и промени во конфигурацијата на мрежата, овие обиди ненамерно довеле до дополнително зголемување на напонот.

Околу половина час подоцна, ситуацијата започнала брзо да ескалира. Во 12:32 часот, наглото зголемување на напонот довело до масовно исклучување на генераторите во неколку шпански региони, меѓу кои Гранада, Севиља, Бадахоз и Сеговија. Во само неколку секунди потоа, системот почнал да губи фреквенциска стабилност, а до 12:33 часот Шпанија ја изгубила синхронизацијата со остатокот од европската електрична мрежа.

И покрај драматичниот расплет, реакцијата на системот за обновување беше импресивна. Преку активирање на прекуграничните врски со Франција и Мароко, како и користење на хидроенергетските капацитети во сливот на Дуеро, снабдувањето со електрична енергија започна да се обновува уште истата вечер. До 22:00 часот биле задоволени половина од вкупните енергетски потреби, а до 07:00 часот следниот ден – дури 99,95%.

Прочитај повеќе

Економија

Профитите на германските автомобилски гиганти паднаа на најниско ниво од 2009 година

Германската автомобилска индустрија бележи најтежок квартал во последните 15 години. Според анализа на консултантската фирма EY, оперативните профити на Volkswagen, BMW и Mercedes-Benz меѓу јули и септември се намалиле за 76%, достигнувајќи околу 1,7 милијарди евра.

Ова претставува најниско ниво на профит од 2009 година, иако вкупниот приход и продажба останале релативно стабилни. Ниту една друга земја со значајна автомобилска индустрија не забележала толку слаби резултати.

Продажбата на германски автомобили падна најмногу во Кина, за 9%, додека уделот на кинескиот пазар во вкупната продажба се намали од 39% на 29%. Продажбата на премиум модели се намалува, а во сегментот на електрични возила купувачите се повеќе се одлучуваат за локални брендови.

Во Германија, компаниите Bosch, Mercedes и Volkswagen веќе најавија намалување на бројот на вработени. EY предупредува дека ваквите мерки се болни, но неизбежни.

Економија

Историски удар за германската автомобилска индустрија: Волксваген ја затвора фабриката во Дрезден

Германската автомобилска индустрија се соочува со сериозни предизвици откако Волксваген најави дека ќе ја запре производството во својата фабрика во Дрезден. Ова е прво затворање на фабрика во Германија во 88-годишната историја на компанијата, што означува историски момент за индустријата која долго време беше мотор на германската економија.

Причините за затворањето се поврзуваат со структурните промени во автомобилската индустрија, особено транзицијата кон електрични возила и потребата за намалување на трошоците. Од Волксваген соопштуваат дека ќе преземат мерки за поддршка на вработените, вклучително и понуди за пренасочување кон други објекти и програми за обука.

Експертите предупредуваат дека ова затворање може да има пошироки последици врз германската економија и добавувачите во автомобилскиот сектор, особено во регионот околу Дрезден. Автомобилската индустрија во Германија, која долго време беше симбол на технолошка извонредност и економска стабилност, сега се соочува со потреба од брзи адаптации за да остане конкурентна на глобалниот пазар.

Економија

Од полноќ нови цени на горивата

Регулаторната комисија за енергетика, водни услуги и услуги за управување со комунален отпад (РКЕ) донесе Одлука со која се врши намалување на малопродажните цени на нафтените деривати во просек за 2,09% во однос на одлуката од 12.12.2025 година. Поевтинуваат горивата од полноќ.

Малопродажните цени на бензините ЕУРОСУПЕР БС-95 и ЕУРОСУПЕР БС-98 како и на ЕУРОДИЗЕЛ (Д-Е V) се намалуваат. Поевтинуваат горивата за 2,00 ден/лит.

Малопродажната цена на Екстра лесното масло за домаќинство на (ЕЛ-1) се намалува за 1,00 ден/лит.

Малопродажната цена на Мазутот М-1 НС се намалува за 0,248 ден/кг и сега ќе изнесува 32,635 ден/кг.

Од 16.12.2025 година од 00:01 часот максималните цени на нафтените деривати ќе изнесуваат:

Моторен бензин ЕУРОСУПЕР БС – 95 73,00 (денари/литар)
Моторен бензин ЕУРОСУПЕР БС – 98 75,00 (денари/литар)
Дизел гориво ЕУРОДИЗЕЛ БС (Д-Е V) 66,50 (денари/литар)
Масло за горење Екстра лесно 1 (ЕЛ-1) 65,50 (денари/литар)
Мазут М-1 НС 32,635 (денари/килограм)