САД подготвуваат евакуација на свои државјани од Израел

Американскиот амбасадор во Ерусалим, Мајк Хакаби, објави на социјалната мрежа Икс дека Амбасадата на САД работи на план за евакуација на американските граѓани од Израел, во светло на зголемените тензии и тековниот конфликт со Иран.

Според објавата, сите американски државјани кои ќе сакаат доброволно да го напуштат Израел ќе бидат евакуирани преку специјално организирани летови и бродски линии. Деталите за логистиката и временската рамка ќе бидат соопштени дополнително, откако ќе се финализира координацијата со израелските власти и безбедносните служби.

„Безбедноста на нашите граѓани е приоритет. Работиме напорно за да обезбедиме безбедна и организирана евакуација за сите што ќе изразат потреба да заминат,“ напиша Хакаби.

Одлуката доаѓа во време на засилена воена активност во регионот, со потенцијал за понатамошна ескалација. Американските власти ги повикуваат своите граѓани во Израел внимателно да ја следат ситуацијата и да останат во контакт со Амбасадата.