Република

Во Штип започна изградба на дом за четворката: Хуманитарна акција за семејството Зикови

Во центарот на Штип започна расчистување на теренот каде што ќе се гради новиот дом за семејството Зикови и нивните четири близначиња – Михаил, Теодор, Ведран и Леонтина. Плацот од 470 квадратни метри е донација од Општина Штип, која со одлука на Советот ги ослободи Зикови и од сите комунални давачки и данок на промет.

Иако теренот е тежок за работа, неколку компании доброволно се вклучија во расчистувањето. Целата организација ја води хуманитарната организација „Подај рака спаси живот“, предводена од Александар Георгиевски, кој упати повик до сите хумани граѓани да се вклучат во изградбата на новиот дом.

„Четирите близначиња и нивните родители заслужуваат достоинствен живот. Кампањата е започната, а од сите нас зависи дали ќе успееме да ја оствариме оваа хумана цел“, порача Георгиевски.

Преку платформата Икрауд е организирана донациска акција со цел да се соберат 2 милиони денари во рок од 65 дена. Досега се собрани 152.700 денари. Активен е и телефонски број за донации – 143 999 – достапен преку сите мобилни оператори, како и жиро-сметка за уплати.

Изградбата на куќата ја поддржуваат и бројни компании, а Општина Штип најави дополнителна логистичка помош. „Обезбедивме проект и издадовме дозвола за градба. Ќе помогнеме и во самата изградба“, изјави Вишна Шорова – Ангелова, секретар во Општина Штип.

Малите Михаил, Теодор, Ведран и Леонтина имаат само една година и девет месеци, а веќе одат во градинка, обезбедена од општината. Нивните родители Благица и Александар велат дека сегашниот дом, куќата на родителите на Александар, е веќе премал за шестчленото семејство.

„Предизвик е да се одгледуваат четири деца во исто време, особено кога само еден родител работи“, велат Зикови, надевајќи се дека со помош на граѓаните ќе го добијат домот што им е толку потребен.

Македонија

Приведен поранешниот државен правобранител Фехми Стафа во рамки на истрага за корупција

Поранешниот државен правобранител Фехми Стафа е приведен во рамки на истрага што ја водат надлежните институции, а која се однесува на сомневања за коруптивни дејствија, информираат извори блиски до истрагата.

Според досегашните информации, приведувањето е извршено по наредба на обвинителството, кое спроведува предистражна постапка за наводни злоупотреби поврзани со вршењето на јавната функција. Деталите за случајот засега не се целосно соопштени, со оглед на чувствителноста на истрагата.

Од надлежните институции потврдуваат дека се преземаат повеќе истражни дејствија, вклучително и прибирање документација и испитување на лица, со цел целосно расветлување на настаните. Стафа, како и сите лица опфатени со постапката, ужива претпоставка на невиност до правосилна судска одлука.

Се очекува обвинителството во наредните денови да излезе со официјални информации за предметот, откако ќе завршат првичните истражни активности.

Република

ВИДЕО: Битола секоја година се поубаво украсена

Битола повторно ја облече новогодишната светлина и ја отвори вратата за празничната магија што ја прави препознатлива. Улиците, плоштадите и сцените каде што и оваа година ќе се одвива „Зимската приказна“ засветкаа во празничен сјај, носејќи радост и топла атмосфера за граѓаните и посетителите.

Новогодишното украсување донесе свежа енергија и чувство на празнична возбуда низ целиот град, создавајќи амбиент кој секоја година изгледа сè поубаво и повпечатливо. Битола и овој декември е подготвена да ги пречека гостите со светлина, музика и празничен дух.

Со видео ви пренесуваме дел од атмосферата од градот под Пелистер, кој е подготвен за уште едно ново издание на предновогодишната програма „Зимска приказна“, на радост на сите генерации.

Република

„Шпанец“ се враќа на пругите: Модернизиран и подготвен за патници

Легендарниот воз „Шпанец“, некогаш заборавен и речиси отпишан, се враќа на пругите со целосно нов лик. Денес беше тестирана обновената верзија на возот, кој сега располага со модерен дизајн, телевизори, озвучување, алармни системи и видео надзор.

Одговорните најавуваат дека подготовките за поудобно и побезбедно патување се во полн ек, со цел патниците да уживаат во современо и безбедно патување.

Следуваат уште новости за враќањето на овој легендарен воз – останете со нас за сите детали.

Видеото може да го погледнете тука