Балкан

Бугарски европратеник: Признавањето на македонскиот идентитет од ЕП би ја отворило Пандорината кутија

Бугарскиот европратеник Никола Минчев од коалицијата „Продолжуваме со промената – Демократска Бугарија“ се спротивстави на можноста Европскиот парламент (ЕП) во извештајот за напредокот на Македонија да го спомене македонскиот идентитет и јазик.

„Признавање на култура и на идентитет на која и да е држава не е работа на Европскиот парламент. ЕП е политички орган, а не историски или културен. Со вакво признавање ќе се отвори Пандорината кутија и други држави ќе почнат да бараат исто“, изјави Минчев за Бугарската телеграфска агенција (БТА).

Со оваа изјава, тој се придружи на групата бугарски европратеници кои изминативе денови остро го критикуваат македонскиот премиер Христијан Мицкоски, во контекст на одложувањето на гласањето за извештајот во Комисијата за надворешни работи на ЕП од 4 на 24 јуни. Гласањето во пленарната седница во Стразбур е закажано за јули.

Минчев, кој е дел од парламентарната група „Обнови ја Европа“, оцени дека изјавите на Мицкоски дека извештајот ги признава македонските идентитет и култура „се разминуваат со реалноста“.

„Би го повикал премиерот на Северна Македонија да го преосмисли своето поведение и однесување, како кон Бугарија, така и кон работата на Европскиот парламент“, порача тој, реагирајќи на очекувањето на Мицкоски дека бугарските европратеници ќе ги повлечат своите амандмани на извештајот.

Минчев отиде и чекор подалеку, споредувајќи го однесувањето на Мицкоски со тоа на српскиот претседател Александар Вучиќ и унгарскиот премиер Виктор Орбан.

„Оваа линија на влијание својата потпора ја наоѓа надвор од Европската унија, и тоа во Москва“, заклучи Минчев.

Балкан

Рама поддржува ограничување на правото на вето за новите членки на ЕУ

Албанскиот премиер Еди Рама оцени дека предложената идеја на Европската Унија за ограничување на правото на вето на новите членки на почетокот од нивното членство е „добра“. Предлогот има за цел да ги смири скептичните главни градови кон проширувањето на Унијата.

„Мислам дека е добра идеја“, изјави Рама за „Политико“ пред самитот ЕУ-Западен Балкан. Тој додаде дека несогласувањата во ЕУ се неизбежни, но дека пристапот на Албанија ќе се разликува од оној на Унгарија кога станува збор за блокирање на политиката на Унијата.

Рама потенцираше дека новите членки треба отворено да ги искажуваат своите ставови, но на крајот да се придржуваат кон колективните одлуки. Албанија се смета за еден од фаворитите за полноправно членство, со цел да стане членка на ЕУ до 2030 година.

Балкан

ЕУ ја укинува блокадата кон Косово: 205 милиони евра помош наскоро достапни

Европската Унија одлучи да ги укине сите санкции против Косово до крајот на јануари 2026 година, што ќе овозможи на земјата да добие 205 милиони евра помош на почетокот на новата година. Одлуката следи по мирната транзиција на локалната власт во северните општини со мнозинство Срби.

Санкциите, кои досега предизвикаа штета од над 613 милиони евра, се однесуваа на клучни сектори како животната средина, енергетиката, дигитализацијата и културата.

Претседателката на Косово, Вјоса Османи, преку социјалните мрежи изрази благодарност до лидерите на ЕУ и сите партнери на Косово за признавањето на посветеноста на земјата во овие процеси.

Балкан

Масовни дојави за бомби во училишта низ БиХ, учениците евакуирани

Утрово повеќе основни и средни училишта во Тузланскиот кантон во Босна и Херцеговина добија дојави за бомби, што доведе до прекин на наставата и итна евакуација на учениците и персоналот. Полициските екипи се на терен и преземаат мерки за проверка на заканите. Според неофицијални информации, пријавите главно биле испраќани преку електронски адреси.

Владата на Тузланскиот кантон и Министерството за образование и наука соопштија дека сите активности се спроведуваат во согласност со законските и безбедносните протоколи. „Училишните администрации и наставниот кадар дејствуваат одговорно, а безбедноста на учениците, наставниците и другите вработени е апсолутен приоритет“, велат од Владата. Учениците беа безбедно евакуирани и испратени во своите домови.

Покрај Тузла, дојави за бомби беа пријавени и во училишта во Република Српска, вклучувајќи градови како Бања Лука, Приједор, Прњавор, Лакташи, Требиње и Добој. Полицијата веднаш започна контрасаботажен преглед и обезбедување на објектите.