Израелскиот министер за одбрана, Израел Кац, денеска изјави дека „кукавичкиот“ ирански лидер Али Хамнеи ќе биде повикан на одговорност за „своите воени злосторства“ по ракетниот напад врз болницата Сорока во Бершева, на југот од Израел.
„Кукавичкиот ирански диктатор седи длабоко во утврден бункер и намерно ги напаѓа болниците и станбените објекти во Израел“, истакна Кац.
Според него, овие се најтешки воени злосторства и Хамнеи ќе одговара за нив.
Кац додаде дека тој и израелскиот премиер Бенјамин Нетанјаху им наредиле на вооружените сили да ги интензивираат нападите врз стратешките цели во Иран и објектите поврзани со режимот во Техеран, со цел да се елиминираат заканите по Израел и да се „дестабилизира режимот на ајатолахот“.
Израелската болница во Бершева беше погодена утрово, во најновиот ирански балистички ракетен напад врз Израел, при што повеќе од 30 лица се повредени, од кои четворица се во потешка состојба, соопшти медицинската служба МАГЕН Давид Адам.
Покрај Бершева, ракетни напади имаше и во Тел Авив, Рамат Ган и Холон, со голема материјална штета.
Иран тврди дека целите на нападот биле исклучиво воени, додека Израел наведува дека најблиската воена база е на неколку километри од болницата која беше погодена.
Иранската агенција Тасним објави дека главна цел на утринскиот напад бил штабот на Командата и разузнавачките служби на Израелските одбранбени сили, како и разузнавачкиот камп во технолошкиот парк Гав-Јам, лоциран покрај болницата.
Агенцијата наведува дека во овие центри се распоредени илјадници израелски војници, како и дигитални командни и сајбер оперативни системи.
Тасним ги демантираше извештаите во израелските медиуми дека иранскиот напад го погодил самиот болнички објект, наведувајќи дека нападот бил насочен кон воените позиции.
