Путин донесе одлука за Украина: Ситуацијата може драстично да се промени

Путин со остра порака: „Доколку нема договор, Русија ќе ги постигне целите по воен пат“

Рускиот претседател Владимир Путин денеска порача дека на територијата на Украина нема да останат вооружени сили кои во иднина би можеле да претставуваат закана за Русија и нејзиниот народ. Според него, Киев мора итно да донесе одлука – дали сака мир или целосен воен пораз.

– Ако Украина не постигне договор со Русија сега, додека преговорите се водат во Истанбул, ситуацијата за нив драстично ќе се влоши. Веќе нема простор за одолговлекување – изјави Путин.

Тој додаде дека, во случај на неуспех на преговорите, Москва ќе ги реализира своите цели со други средства.

„Ако не постигнеме договор по мирен пат, ќе ги оствариме целите по воен“, потенцираше рускиот претседател.

„Киев ja започна војната, Русија се обидува да ја заврши“

Говорејќи за причините за конфликтот, Путин повтори дека Русија не е таа што ја започнала војната во Украина.

– Тоа беше Киев, кој ја употреби својата армија против цивилното население во Донбас. Русија се обидува да стави крај на таа војна – изјави тој.

Состанок со Трамп – само со сериозна подготовка

Одговарајќи на новинарско прашање за евентуален состанок со американскиот претседател Доналд Трамп, Путин оцени дека таква средба би можела да биде корисна, но само ако е внимателно и темелно подготвена.

„Трамп е пред сè бизнисмен, и тоа е неговата предност. Тој размислува пресметано – и во политиката, и во односите со Русија“, истакна Путин.

Овие изјави доаѓаат во момент кога преговорите во Истанбул се на клучна пресвртница, а Москва отворено дава до знаење дека е подготвена и за дипломатско, и за воено решение.