Градоначалникот на Кисела Вода, Орце Ѓорѓиевски, објави нова мерка насочена кон поддршка и мотивација на младите, со која најдобрите ученици од општината добиваат заслужено признание за својот труд.
Како дел од стратегијата за поттикнување на квалитетното образование и вреднување на знаењето, општината обезбеди бесплатно летување во едукативно-рекреативниот камп SCOUT во Охрид за вкупно 24 првенци на генерација од сите осум основни училишта во Кисела Вода. Тројцата најуспешни ученици од секое училиште беа наградени со оваа единствена можност за одмор, дружба и неформално учење.
Дополнително, девет ученици со највисок број поени беа наградени со висококвалитетни очила за сонце од реномираниот бренд BARNER, како симболична, но значајна награда за нивниот вонсериски успех.
„Создаваме систем кој ги препознава и наградува вредностите на трудот, знаењето и упорноста. Горди сме што во Кисела Вода растат генерации што ветуваат“, изјави градоначалникот Ѓорѓиевски, истакнувајќи дека ваквите активности се дел од поголема мисија за изградба на стимулативна средина за младите.
Според него, образованието е клучен инструмент за индивидуален и општествен напредок, а општината останува посветена на креирање услови во кои секое дете ќе има еднаква шанса да го реализира својот потенцијал.
Со ваквите потези, Кисела Вода станува пример за тоа како локалната самоуправа може да биде реален сојузник на младите и нивниот успех.
