Адвокатот на првообвинетиот Љупчо Палевски, Јовица Страшевски, во завршните зборови пред судот побара неговиот клиент да биде ослободен од обвиненијата за убиствата на Вања Ѓорчевска и Панче Жежовски.
Страшевски истакна дека во обвинителниот акт не е прецизно наведено кои дејствија ги презел Палевски, а самиот документ, според него, е контрадикторен и ги искривува фактите со цел да се создаде погрешна слика пред јавноста и судот.
„Нема докази и наместо Јавното обвинителство да ја сопре постапката, поднесе обвинителен акт со низа законски пропусти. Пресудата беше однапред најавена дури и пред да почне постапката, а медиумите тоа го презентираа, без почитување на уставното право на презумпција на невиност“, изјави Страшевски.
Тој го обвини судијата од претходната постапка дека одлучувал без да има доставени докази, туку само врз основа на обвинението, што, како што вели, претставува прекршување на Законот за кривична постапка.
Во обвинителниот акт, додаде Страшевски, не се наведени цврсти факти со кои надвор од разумен сомнеж се докажува дека Палевски ги организирал и извршил убиствата.
„Обвинителството не го докажа ниту времето на убиството на Панче, а за убиството на Вања мотивот остана непознат“, рече адвокатот, посочувајќи дека во истрагата останале многу неодговорени прашања.
