Основниот суд во Струга го прогласи за виновен градоначалникот Рамиз Мерко за кривичното дело „несовесно работење во службата“, поради нерегуларности при назначувањето вршители на должност директори во неколку општински основни училишта во селата Лабуништа, Радолишта и Подгорци.
Судијата Јордан Јованов, кој го водеше предметот, му изрече на Мерко парична казна од 100 дневни глоби, што во вкупен износ изнесува околу 10.000 евра. При образложувањето на пресудата, Јованов наведе дека биле земени предвид олеснителни околности – пред сè фактот дека обвинетиот досега не бил осудуван.
Според судот, Мерко постапил спротивно на Законот за основно образование при назначувањето на директорите – без јавен оглас, без исполнување на законските услови, и со повеќекратно повторување на функцијата на исто лице без потребното одобрение. Во доказната постапка беа приложени извештаи и записници од Државниот просветен инспекторат, кои укажувале на континуирани прекршувања.
„Станува збор за продолжена постапка, со повторени прекршувања во повеќе училишта и за повеќе лица. Правилата се јасни и не смеат да се заобиколуваат“, изјави судијата Јованов.
Обвинителството најави жалба на пресудата.
Против Мерко се водат уште два активни предмети за слични прекршувања, во училиштата „Браќа Миладиновци“ и во село Велешта. За последниот случај се очекува разврска следниот месец, а во друг се чека сослушување на последен сведок. Дополнително, Мерко се соочува со постапка за незаконско поставување спомен-обележје пред општинската зграда.
Пред десет дена, Судот во Струга донесе ослободителна пресуда за Мерко во друг предмет поврзан со набавка на службени возила во вредност од 114.000 евра, вклучително и луксузно „Ауди А6“.
