Свет

Иран синоќа испроба ново оружје: Предизвикува максимална штета, а се активира на висина од 7 километри

Иранската армија, во текот на синоќешните напади врз Израел, употребила проектили со касетна муниција – за првпат пријавено користење на ваков тип оружје во седумдневниот конфликт, соопшти израелската армија и израелската амбасада во Вашингтон.

„Иранските вооружени сили лансираа проектил со касетна боева глава врз населено цивилно подрачје во Израел“, наведено е во соопштението што амбасадата го испрати до агенцијата Reuters, без да се прецизира точната локација на нападот.

Во пораката се истакнува дека касетната муниција е дизајнирана да предизвика максимална штета преку распрснување на подмуниција на пошироко подрачје.

„Иран незаконски и намерно цели кон цивилни области, со цел да ја зголеми разорната моќ на нападите користејќи оружје со широк радиус на дејство“, се додава во соопштението.

Иранската мисија при Обединетите нации не одговорила на барањето за коментар.

Според израелски воени извори, кои ги цитираат локалните медиуми, боевата глава на проектилот се отворила на висина од околу 7 километри и исфрлила приближно 20 подмуниции во радиус од 8 километри над централниот дел на Израел. Едно од парчињата удрило во куќа во градот Азор, предизвикувајќи материјална штета, но без жртви.

Касетните бомби се сметаат за контроверзни поради нивниот неселективен карактер – подмунициите што не експлодираат при удар остануваат опасни долго по завршување на конфликтот, со што претставуваат сериозна закана за цивилното население. Израелската армија објави предупредувачки графики со цел да ја информира јавноста за ризиците од неексплодирана муниција.

И покрај тоа што Конвенцијата за забрана на касетна муниција од 2008 година е потпишана од 111 земји и 12 други ентитети, ниту Израел, ниту Иран не ѝ се приклучија. Слично, САД во 2023 година испратија касетна муниција во Украина за борба против руските сили, а Киев тврдеше дека и руската армија употребувала исто оружје.

Само три земји – Иран, Израел и САД – досега одбиле да ѝ се придружат на конвенцијата, која има за цел да го забрани производството, складирањето, преносот и користењето на касетни бомби.

Свет

Американски Конгрес: Корупцијата и странското влијание ја кочат европската перспектива на Балканот

Зависноста од руските енергенси, зголеменото влијание на Кина и широко распространетата корупција се идентификувани како клучни пречки за европската интеграција на земјите од Западен Балкан, се наведува во Законот за овластување за национална одбрана на САД, усвоен од Конгрес на САД, кој треба да го потпише американскиот претседател Доналд Трамп.

Во делот посветен на регионот, документот јасно посочува дека САД нема да поддржат политики што поттикнуваат територијални размени, поделби или прецртување на границите по етнички линии, како и дека ќе се спротивстават на, како што се наведува, злонамерните политики на Русија и Кина во Западен Балкан. Вашингтон ја потврдува и својата поддршка за евроатлантската интеграција, демократскиот развој и економската стабилност на земјите од регионот.

Во законот се предупредува дека растечкото кинеско влијание може негативно да се одрази врз демократијата, стратешката конкуренција и економската интеграција со Европа. Се нагласува дека САД и земјите од Западен Балкан имаат заеднички интерес за стабилен и одржлив економски развој и спречување на повторна ескалација на етнички тензии.

Документот предвидува и можност за воведување санкции против поединци или политики што го загрозуваат мирот, безбедноста или територијалниот интегритет на која било земја во регионот. Посебен акцент е ставен на корупцијата, која се оценува како една од најсериозните пречки за политичкиот и економскиот напредок.

Според законските одредби, претседателот на САД може да воведе санкции во рок од 90 дена од стапувањето во сила на законот против секое странско лице за кое ќе се утврди дека било вклучено во коруптивни активности поврзани со Западен Балкан, вклучително и актуелни или поранешни јавни функционери.

Во документот се изразува и длабока загриженост за состојбата на демократијата во Србија по последните изборни процеси, како и за потребата од напредок во спроведувањето на договорите меѓу Белград и Приштина. Дополнително, се нагласува значењето на продолжувањето на мисијата на ЕУФОР во Босна и Херцеговина.

Свет

Инцидент со огнено оружје во Њујорк: Ранети тројца полицајци по семејна расправија

Тројца полициски службеници се здобиле со повреди, а осомничениот напаѓач е прогласен за мртов по сериозен инцидент со огнено оружје во градот Рочестер, сојузната држава Њујорк.

Според информациите, инцидентот започнал како семејна расправија, која ескалирала во насилна конфронтација што се проширила на неколку улици во градот. Полицијата интервенирала по пријава, при што дошло до пукање.

Како што пренесува Асошиејтед Прес, покрај тројцата полицајци, повреден е и уште еден маж. Засега нема информации за тежината на повредите, а надлежните органи спроведуваат истрага за целосно расветлување на настанот.

Свет

Над 350 уапсени во голема полициска акција во Италија

Италијанските власти спроведоа масовна операција против трговија со дрога, при што уапсени се 384 лица, а запленети 1,4 тони дрога.

Покрај апсењата, полицијата отвори истраги против уште 655 лица, меѓу кои и 39 малолетници, и заплени 35 килограми кокаин и повеќе од 40 парчиња огнено оружје. Операцијата се спроведуваше во неколку провинции и резултираше со привремено затворање на пет продавници за канабис во три града по 312 инспекции.

За време на контролите, полицијата одзеде 296 килограми производи од канабис, кои тестовите покажаа дека содржат нелегални дроги. Во јуни оваа година, Италија воведе нови безбедносни регулативи со кои се забранува продажбата на таканаречениот „легален“ или „лесен“ канабис, односно индустриски коноп без психоактивни ефекти.