Република

Позитивни резултати и нови терапии за повредените од „Пулс“ – Кочанската болница со засилена грижа и инвестиции

Педесет и осум лица повредени во трагичниот пожар во дискотеката „Пулс“ во Кочани веќе носат компресивна облека, која, според лекарите, дава видливи резултати во третманот на лузните. Директорката на Општата болница во Кочани, д-р Катерина Папиќ-Мирчовска, информираше дека облеката се носи најмалку две години и овозможува пациенти да се движат и да посетуваат физикална терапија.

Дополнително, уште 14 пациенти се во процес на мерење за ваква опрема. Во болницата пристигнаа и нови специјални креми и 95 лепенки за третман на изгореници, со набавка што ќе се одвива според достапноста на пазарот.

Во пожарот загинаа 62 лица, а над 200 беа повредени. Десет пациенти и натаму се на лекување, половина во странски, а половина во македонски здравствени установи.

За забрзување на заздравувањето, веќе се применува и ПРП терапија – иновативен третман со плазма од сопствената крв на пациентот. Досега 19 лица се третирани од два различни медицински тима од Скопје. Сите идни пациенти ќе добијат повик со точен термин.

Во координација со Министерството за образование, се планира и поддршка за учениците жртви во трагедијата, со цел нивно редовно вклучување во наставата.

Портпаролката на Владата, Марија Митева, нагласи дека Владата инвестира системски во здравствениот сектор во Кочани. Во тек е целосна реконструкција на просторот за физикална медицина на 350 м², што вклучува нова електрична, водоводна и противпожарна мрежа, замена на прозорци, врати, подови и поставување на нова хидрантска инсталација.

Од утре започнува приемот на пациенти и во рехабилитацискиот центар на Пониква, каде што се направени подготовки и дезинфекција, поставени се комарници и обновени се спортските игралишта.

– Кочани добива системска грижа. Денес вложуваме во инфраструктурата, безбедноста и достапноста на здравствениот систем – истакна Митева, потенцирајќи дека грижата за повредените не престанува, туку се засилува.

Република

Јавна расправа за урбанистичкиот план на новиот реонски центар во Нова Битола

Во салата на Советот на Општина Битола денеска се одржа јавна презентација на Деталниот урбанистички план за новиот реонски центар во населбата Нова Битола.

На настанот, граѓаните имаа можност детално да се запознаат со предлог-решенијата и активно да учествуваат во процесот со свои мислења, предлози и забелешки поврзани со планираниот развој на просторот.

Предложениот план предвидува создавање модерен и функционален урбан простор, со изградба на нов спортски комплекс, детска градинка, дом за стари лица, плоштад и повеќе јавни содржини наменети за жителите на овој дел од градот.

Јавната анкета за планот ќе трае до 16 јануари 2026 година, а заинтересираните граѓани дополнителни информации можат да добијат преку официјалната интернет-страница на Општина Битола.

Република

Тоневски: Празнична радост од дечињата од градинката „Срничка“ во Општина Пробиштип

Во духот на новогодишните и божиќните празници, просториите на Општина Пробиштип денеска беа исполнети со детска радост и празнична атмосфера благодарение на посетата на дел од дечињата од детската градинка, објект „Срничка“.

Со искрени насмевки, ведрина и празнична магија, најмладите внесоа топлина во општинската зграда, создавајќи пријатна и емотивна атмосфера за сите присутни.

Градоначалникот на Општина Пробиштип, Тони Тоневски, истакна дека децата се срцето и иднината на секоја заедница и дека нивната безгрижна радост е најубав потсетник за вистинските вредности во општеството.

Тоневски им упати искрени честитки за претстојните празници, посакувајќи им на дечињата среќна, здрава и успешна Нова година, исполнета со љубов и детска смеа. Тој упати и благодарност до вработените во градинката „Срничка“ за нивната грижа, посветеност и љубов кон најмладите.

Република

Камери за контрола на сообраќајот поставени на улиците во Тетово

Во Тетово започна поставувањето на камери од системот „Безбеден град“ на повеќе градски улици и булевари. За разлика од претходно, кога вакви камери имаше само на влезот во градот од скопска страна, сега тие се инсталираат и во самото градско подрачје.

Камери веќе се поставени на булеварите „Илинден“ и „Видое Смилевски-Бато“, а жителите велат дека забележале уреди и на други локации низ градот.

Граѓаните очекуваат новиот систем да помогне во намалување на сообраќајниот хаос, кој со години е еден од најголемите проблеми во Тетово.

„Поставувањето камери е неопходно со оглед на тоа каков сообраќаен хаос владее во градот. Останува да се види дали навистина ќе има ефект и дали граѓаните ќе почнат повеќе да ги почитуваат правилата“, вели жител на Тетово.

Други граѓани сметаат дека електронскиот систем ќе ја намали можноста за избегнување казни. „Тетово отсекогаш било специфично кога станува збор за почитување на сообраќајните правила. Но, кога казнувањето е автоматизирано, потешко е да се избегне одговорност“, истакнува жителка на градот.

Камери од системот „Безбеден град“ веќе се поставени во Скопје и Куманово, како и на автопатите „Мајка Тереза“ и „Пријателство“. Тест-периодот започна на 1 декември, а системот со изрекување казни официјално ќе почне да функционира од 1 февруари. Од Министерството за внатрешни работи информираа дека во првите 24 часа од тестирањето биле регистрирани над 110 илјади сообраќајни прекршоци.