Американското воено воздухопловство ја откри причината зад неодамнешниот лет на т.н. „авион за судниот ден“ – специјалниот Boeing E-4B, кој предизвика шпекулации и загриженост во јавноста.
На 17 јуни, љубителите на авијацијата го забележаа E-4B во лет, што ги поттикна стравувањата од глобален конфликт, особено во услови на зголемени тензии меѓу Израел и Иран.
Изјавата на Доналд Трамп дека „можеби“ ќе нареди напад врз Иран, дополнително ја зголеми вознемиреноста. Во таков контекст, активирањето на авион дизајниран за нуклеарни кризи – како летечка команда во случај на катастрофа – се сметаше за знак за можна ескалација.
Сепак, Американското воздухопловство објасни дека летот бил рутинска, однапред планирана мисија, без никаква врска со случувањата на Блискиот Исток. Авионoт „Nightwatch“ полетал од Луизијана, кружел над источниот брег и слетал на базата Ендрјус во Мериленд.
На официјалниот X-профил на воздухопловството беше објавена фотографија од посетата на секретарот Трој Мајнк, кој добивал брифинзи за стратешки програми. Со тоа беа отфрлени теориите за вонредна состојба.
Интерес предизвика и промената на повикувачкиот знак – од вообичаениот „ORDER6“ на „ORDER01“. Иако тоа предизвика нови шпекулации, засега нема официјално објаснување, а можно е да станува збор за административна промена без поголемо значење.
