Најмалку 202 тела се пренесени во болниците во Појасот Газа во последните 48 часа, соопшти денеска палестинското Министерство за здравство, пренесува „Ал Џазира“.
Во истиот период, најмалку 1.037 лица биле повредени во израелски воздушни и копнени напади, се наведува во извештајот.
Од почетокот на војната меѓу Израел и палестинското движење Хамас, која започна во октомври 2023 година, загинале најмалку 55.908 Палестинци, а повредени се 131.138 лица.
Од март годинава, кога не беше продолжено претходно постигнатото примирје, израелските напади резултирале со смрт на 5.599 Палестинци, додека 19.097 се повредени.
Хуманитарната состојба во Појасот Газа останува критична, со сè поголем број жртви и разурната инфраструктура, додека меѓународната заедница повторно повикува на прекин на огнот и итна испорака на хуманитарна помош.
