Инстаграм воведува нов сет функционалности и унапредувања кои имаат за цел да го поедностават и збогатат корисничкото искуство. Најновото ажурирање, кое веќе е достапно за дел од корисниците, овозможува директна интеграција со платформата Spotify во рамки на функцијата Notes, со што се овозможува во реално време да се споделуваат песни кои се слушаат во моментот.
Новитетот автоматски го синхронизира привремениот статус во делот Stories со Spotify, при што секоја промена на песната веднаш се рефлектира и на Инстаграм. Оваа интеграција претставува надградба на минатогодишната функција „Add to Spotify“, а целта е да се овозможи подинамична и поперсонализирана комуникација меѓу двете платформи.
Досега, додавањето музика во Notes се вршеше рачно, но со новата функција, целиот процес е автоматизиран. Корисниците ќе можат со едноставен допир на зелениот балон над профилната икона да го видат името на песната и изведувачот.
Овие промени се дел од пошироката кампања на Инстаграм насловена „Anyway“, чија цел е да го намали притисокот и анксиозноста што многумина го чувствуваат при објавување содржини, и да ја поттикне креативноста и спонтаноста.
Уредување на објави и тестирање на видеа пред објава
Како уште еден важен чекор, Инстаграм наскоро ќе овозможи корисниците рачно да го уредуваат изгледот на нивниот профил преку реорганизација на објавите. Наместо да бидат ограничени на обратно-хронолошки редослед, од оваа недела ќе можат сами да го одредат редоследот на прикажаните содржини. Оваа функција е особено корисна за креатори и брендови кои водат сметка за визуелниот изглед на нивниот профил.
Дополнително, се проширува и пристапот до функцијата за тестирање Reels видеа, која овозможува преглед на перформансите кај нова публика пред финалната објава. Првичните резултати покажуваат дека оваа алатка води до зголемена активност – кај некои корисници дури за 40 проценти.
Инстаграм и на iPad – конечно достапен
Како дел од стратегијата за модернизација, Meta потврди дека работи на посебна Instagram апликација за iPad – опција која корисниците одамна ја бараат. Овој чекор има за цел да го унапреди искуството на корисниците на Apple таблети, кои досега беа ограничени во однос на Android корисниците.
Сите овие промени ја потврдуваат намерата на Инстаграм да го прилагоди својот производ на потребите на корисниците, истовремено охрабрувајќи креативност и поголема леснотија при објавувањето содржини. Нови функции веќе се тестираат, а компанијата најави дека наскоро ќе открие повеќе детали.
