„Буџетот е во одлична состојба, ерата на стихијно трошење и ’молзење‘ на државната каса заврши,“ порача премиерот Христијан Мицкоски во своето последно гостување на ТВ Сител. Со остар тон кон критиките на опозицијата и јасен план за финансиска консолидација, тој стави точка на шпекулациите за „заклучениот“ трезор.

Премиерот децидно појасни дека фамозниот 15 декември не значи прекин на исплатите, туку иницијатива за ставање крај на практиката „во 5 до 12“.

„Сакаме ред. Минатата година сведочевме на хаос во последните денови од декември, што ги остави доверителите во неизвесност. Иако трезорот ќе процесира налози и на 31 декември, време е за финансиска дисциплина. Мора еднаш засекогаш да научиме да работиме навремено,“ дециден е Мицкоски.

Одговарајќи на обвинувањата од СДСМ за наводна дупка од 60 милијарди денари, Мицкоски ги нарече овие тврдења чиста невистина. Тој откри дека само во првите десет дена од декември се собрани 15 милијарди денари, а вистинската слика се гледа кога ќе се спојат буџетските и сопствените сметки на институциите. Буџетскиот дефицит е под контрола и ќе биде под 4% од БДП. Државата врати еврообврзница од половина милијарда евра без да издаде нова. Македонија бележи економски резултати кои, во однос на нашиот БДП, се меѓу водечките во Европа.

Премиерот најави немилосрдна борба против злоупотребите во социјалниот систем. Тој откри фрапантни случаи каде поединци, преку разни основи, инкасирале и до 65.000 денари месечно. „Тоа е крадење од државата! Ќе го прочистиме списокот на корисници на ГМП бидејќи се грижиме за иднината, а не за политичките поени,“ порача тој.

Најжестоката порака беше упатена кон бизнис-структурите кои со години го „цицале“ буџетот преку лажни поврат на ДДВ за непостоечки залихи.

„Нема повеќе милионски суми за фиктивни фактури и роба која постои само на хартија. Тие што мислеа дека УЈП ќе мижи пред нивните измами, веќе се во притвори. И тоа е само почетокот.“

Мицкоски заклучи дека е подготвен да ја плати „политичката цена“ за воведување ред, нагласувајќи дека неговата влада нема да дозволи државата да се задолжува за да ги покрива дупките на неодговорното работење од минатото.

„Тесла“ влегува во клучна фаза од својата визија за целосно автономен транспорт. Основачот и извршен директор на компанијата, Илон Маск, потврди дека веќе се спроведуваат тестирања на беспилотно робо-такси, при што возилата се движат без патници и без човечки надзор во кабината.

Веста веднаш се одрази на берзата – акциите на американскиот производител на електрични возила пораснаа за околу пет проценти, достигнувајќи највисоко ниво во речиси една година. Инвеститорите очигледно ја препознаа пораката дека „Тесла“ се приближува кон практична примена на технологијата за целосно автономно возење.

Според Маск, тестирањата претставуваат важен чекор кон комерцијално воведување на таканаречените „сајбер такси“, чие официјално лансирање е планирано за наредната година. Станува збор за возила кои би функционирале без возач, отворајќи нов модел на урбан превоз и потенцијално нов извор на приходи за компанијата.

Иако најголемиот дел од приходите на „Тесла“ сè уште доаѓа од продажбата на електрични автомобили, пазарната вредност на компанијата – проценета на околу 1,53 трилиони долари – во голема мера се темели на очекувањата за успех на технологијата за самостојно возење и идниот бизнис со роботски такси.

Во пресрет на новогодишните празници, како дел од иницијативата #ИнфлуенсериЗаДобро, СОС Детско Село и оваа година ја започнува емотивната хуманитарна инфлуенсерска кампања „150 желби за 150 деца без родителска грижа“.

Целта на кампањата е 150 инфлуенсери, јавни личности и поддржувачи да споделат новогодишна порака посветена токму на 150 деца без родители и родителска грижа, до 14 годишна возраст кои во моментов се поддржани од СОС Детско Село. Со своите пораки, тие ќе придонесат кон ширење на позитивна мисла и ќе донесат чувство на грижа, радост и надеж во празничните денови.

Црвената маичка со автентични детски цртежи е срцето на кампањата. Носејќи ја маичката и споделувајќи ја својата новогодишна желба, инфлуенсерите стануваат „1 од 150“ гласови кои ја користат својата платформа за да ја направат видлива потребата од поддршка на децата без родителска грижа и да поттикнат поширока општествена одговорност.

„Секој кој ќе ја облече маичката и ќе посака желба станува дел од заедницата која се грижи. Јавните личности имаат моќ да инспирираат, да обединуваат и да поттикнат позитивни промени особено кога нивниот глас е насочен за децата на кои им е најпотребна поддршка“- велат од СОС Детско Село.

Вистинската магија доаѓа во јануари

Кампањата ќе трае во текот на месец декември, а во јануари дел од видеата со новогодишните желби ќе им бидат прикажани на децата поддржани од СОС Детско село, со цел да почувствуваат дека зад секоја желба стои некој што се грижи.

Секој може да биде една желба. Со само еден мал гест – донација, споделување или поддршка, можеме заедно да создадеме празнична магија која ќе трае многу подолго од празниците.