Она што требало да биде релаксирачки одмор во Солун за Иванa од Белград и нејзиното семејство, се претворило во низа трауматични и вознемирувачки настани. Своето искуство го споделила во групата „Грција – група за туристе“ на Фејсбук, предизвикувајќи бурни реакции кај членовите.
„Одлучивме да одиме во Солун на седум дена со пријатели. Изнајмивме Mercedes Vito во Белград и преку Airbnb најдовме стан. Единствено позитивно беа домаќините, сè друго беше како од црна комедија“, пишува Ивана.
Приведена поради навигациска грешка
На вториот ден од одморот, таа самата тргнала до продавница, но по враќањето се изгубила на рурален пат, каде што ја запрела грчката полиција. По барање на документи, била приведена во полициска станица и таму задржана на испрашување два часа, иако на крај била пуштена без обвинение.
Претрес до гола кожа
Само неколку стотини метри понатаму, била повторно сопрена, овојпат од специјална полициска единица. „Ме претресоа целосно, дури и до гола кожа. Рекоа дека Србите често користат вакви возила за шверц. Иако не пронајдоа ништо, ме третираа како криминалец“, раскажува Ивана.
Сообраќајна несреќа и повредено дете
Третиот шок доаѓа кога при враќање од плажа, нејзиното возило било удрено од Mini Morris на раскрсница. Од силниот удар, комбито се поместило два метра, а нивната 13-месечна ќерка, иако во седиште, удрила со глава и завршила во болница. „Сè уште сме тука, и јас и бебето“, додава Ивана.
„Чист фашизам“
Таа тврди дека целиот одмор бил обележан со грубост и понижување од страна на полицијата. „Никогаш не сум била третирана полошо. Ова што го доживеав го нарекувам чист фашизам. Грција ме има видено – и не верувам дека некогаш повторно ќе се вратам таму“, заклучува Ивана.
