Крвопролевање во Дамаск: Самоубиствен напад во црква однесе најмалку 15 животи

Најмалку 15 лица загинаа, а повеќе од 25 се повредени во брутален терористички напад врз црквата „Свети Илија“ во центарот на Дамаск, Сирија. Според Министерството за внатрешни работи, нападот го извел бомбаш самоубиец поврзан со Исламска држава.

Напаѓачот најпрво отворил оган врз верниците кои се собирале за вечерна богослужба, а потоа го активирал експлозивот што го носел со себе. Сцените по експлозијата биле хорор – урнатини, крв и паника меѓу преживеаните, изјавија очевидци за локалните медиуми.

Амбулантни возила и безбедносни сили веднаш пристигнале на местото на нападот, префрлајќи ги жртвите во најблиската болница под засилено обезбедување.

Ова е првиот напад врз христијанска верска установа во Дамаск од падот на претседателот Башар ал Асад минатата година, што предизвика стравување за нов бран на религиозно мотивирано насилство.

Министерот за информации Хамза Мостафа го осуди нападот, нарекувајќи го „кукавички терористички чин“ кој е спротивен на основните вредности на сириското општество. Тој додаде дека државата ќе продолжи со „решителна борба против тероризмот и заштита на граѓаните“.

Нападот предизвика шок и осуди низ целата земја и меѓународната заедница, која бара итна акција за спречување на понатамошни напади врз цивили и верски објекти.

ВИДЕО