Свет

Русија вербално со Иран, но внимава да не ја премине линијата

Поранешниот руски претседател и актуелен заменик-претседател на Советот за безбедност на Русија, Дмитриј Медведев, го обвини Доналд Трамп дека „започнал нова војна“, додека поединечни влијателни личности повикаа Москва да му помогне на Техеран. „Време е да му помогнеме на Техеран“, изјави контроверзниот олигарх Константин Малофеев, близок до Владимир Путин, иако е под меѓународни санкции. Сепак, ваквите изјави не се неочекувани.

Иранскиот министер за надворешни работи Абас Аракчи во неделата допатува во Москва, каде што најави „сериозни консултации“ со рускиот претседател Владимир Путин. Тој порача дека Москва останува пријател и партнер, додека Техеран побара итна седница на Советот за безбедност на ОН за осуда на американските напади. Револуционерната гарда пак порача дека „освојувачите ќе се соочат со последици поради кои ќе зажалат“.

И покрај острата реторика, реакцијата на Кремљ досега останува повеќе симболична отколку реална. Аналитичарите наведуваат пет клучни причини за воздржаноста на Москва:

Стратешкиот договор меѓу Русија и Иран не содржи обврска за меѓусебна воена одбрана. Русија е воена ангажирана во Украина и нема капацитет за нов фронт. Кремљ избегнува директна конфронтација со Вашингтон. Фокусот на светот врз Блискиот Исток ѝ одговара на Москва, бидејќи го намалува притисокот врз Украина. Најгласните повици за интервенција доаѓаат од „реторички јастреби“ како Медведев, а не од самиот Путин.

Покрај тоа, Русија има сериозен интерес да избегне понатамошна ескалација. По губењето на влијанието во Сирија со падот на режимот на Асад, и евентуално губење на Иран, Кремљ би останал без сериозен сојузник во регионот. Затоа Путин, во обид да заземе дипломатска иницијатива, разговараше со лидерите на Израел, Иран, САД, Кина и ОАЕ.

Постои можност Москва однапред била информирана за американските напади врз Иран, со оглед на сигналите дека се работи за ограничена акција. Во тој контекст, Путин би можел да се позиционира како посредник што ќе го врати Иран на преговарачка маса – потег што би му создал обврска на Доналд Трамп кон Кремљ, обврска што Русија веројатно би ја наплатила – во Украина.

Свет

Јужноафриканци принудно на фронтот во Донбас: „Не разбравме што потпишуваме“

Јужноафрикански мажи, меѓу кои и постариот брат на Бонгани од покраината Квазулу-Натал, завршиле на фронтот во Донбас, тврди семејството, откако биле регрутирани под лажни ветувања за обука како телохранители.

„Тие немаат воена обука и никогаш не виделе војна. Беше им кажано дека ќе добијат работа за да ги прехранат семејствата, но се најдоа на бојното поле“, изјави Бонгани, чие име е променето за безбедност.

Според сведоштвата, јужноафриканските мажи отпатувале во Русија преку Дубаи, потпишале договори на руски јазик без можност за превод и веднаш биле испратени во Украина. „Проблемите започнаа кога ги префрлија од Русија во Украина и рекоа дека тоа е обука, а потоа ни рекоа дека сме под команда на руската армија“, раскажува Бонгани.

„Скај њуз“ добил пристап до видео пораки од мажи кои тврдат дека биле принудени на борба, а една од нивните контакти била Дудузиле Зума-Самбудла, ќерката на поранешниот јужноафрикански претседател Џејкоб Зума, која ги убедила да потпишат.

Во Јоханесбург, пет лица биле уапсени по пријава дека патувале во Русија преку ОАЕ, меѓу нив и 21-годишник и 39-годишна Патриша Мантуала, обвинета за регрутирање. Судот им одобри кауција, а полицијата не ја исклучува можноста за повеќе апсења.

Семејствата на заробените мажи се обидуваат да ги вратат дома, и покрај опасностите и неизвесноста што ја носи конфликтот. „Никој не е безбеден и никогаш не знаеме што може да ни се случи следно“, вели Бонгани.

Свет

Полскиот претседател: Зеленски недоволно ја цени помошта на Полска за Украина

Полскиот претседател Карол Навроцки денеска во Варшава изнесе критики кон украинскиот лидер Володимир Зеленски, тврдејќи дека Украина не ја цени доволно поддршката што Полска ѝ ја дава во конфликтот со Русија.

Навроцки истакна дека Полска од почетокот на руската инвазија во 2022 година прифатила повеќе од еден милион украински бегалци и е еден од главните добавувачи на оружје и хуманитарна помош за Украина. „Полјаците сметаат дека нашите напори и помошта за Украина не се доволно ценети или разбрани“, рече тој, додавајќи дека ова му го пренел на Зеленски во „решителен и искрен, но и срдечен разговор“.

Зеленски од своја страна нагласи дека Украина отсекогаш била благодарна за полската помош и ќе продолжи да ја цени, посочувајќи дека Украина ја брани Европа од руската агресија по висока човечка цена.

Свет

Американски разузнавачи: Путин сака целосна контрола над Украина и пошироки територии во Европа

Американските разузнавачки служби предупредија дека рускиот претседател Владимир Путин има намера да ја окупира целата Украина и да ја прошири контролата над делови од Европа што некогаш припаѓале на Советскиот Сојуз, и покрај тековните мировни преговори.

Украинската разузнавачка служба, предводена од генерал-потполковникот Кирило Буданов, исто така оцени дека Русија продолжува да има амбиции за проширување на територијата.

Според шест извори запознаени со податоците на американската разузнавачка служба, воените цели на Путин остануваат непроменети, што е спротивно на изјавите на американскиот претседател Доналд Трамп и неговите преговарачи дека Путин бара крај на конфликтот. Европските лидери, како и американските експерти, веруваат дека Путин има намера да контролира целата Украина и територии од поранешниот Советски Сојуз, вклучително и некои членки на НАТО.

„Разузнавањето отсекогаш велеше дека Путин сака повеќе“, изјави Мајк Кугли, демократски член на Комитетот за разузнавање на Претставничкиот дом. „Европјаните се убедени во тоа. Полјаците се апсолутно убедени, а балтичките земји мислат дека се првите кои го знаеле тоа.“

Во моментов, Русија контролира околу 20% од украинската територија, вклучувајќи ги анектираните покраини Луганск, Донецк, Запорожје, Херсон и Крим. Трамп, како дел од предложениот мировен договор, врши притисок врз Киев да повлече дел од своите сили од мал дел од Донецк, што Зеленски и мнозинството Украинци категорично го отфрлаат.

Иако Белата куќа најавува „огромен напредок“ во мировните преговори, Путин на својата годишна прес-конференција не понуди компромиси и нагласи дека неговите услови мора да бидат исполнети. Според официјални податоци, руските сили напредувале за околу 6.000 квадратни километри оваа година.

Американски официјални лица, меѓу кои и државниот секретар Марко Рубио, признаваат дека е неизвесно дали Путин навистина сака мировен договор или неговата цел е целосна контрола над Украина.