САД го изведоа, според зборовите на американскиот претседател Доналд Трамп, „многу успешниот“ воздушен напад врз три ирански нуклеарни локации: Фордо, Натанз и Есфахан. Во објава од Белата куќа, Трамп потврди дека сите американски авиони се безбедно повлечени од иранскиот воздушен простор и дека примарната цел – нуклеарниот објект во Фордо – била целосно погодена со „целосен товар на бомби“.
„Честитки до нашите големи американски војници. Нема друга војска во светот што би можела да го стори ова. Сега е време за мир“, истакна Трамп.
Според првичните информации, ударите биле извршени прецизно и во координација со сојузниците. Засега нема официјален одговор од Техеран, но меѓународната заедница внимателно ја следи ситуацијата, стравувајќи од можно ескалирање на тензиите на Блискиот Исток.
Оваа акција доаѓа во контекст на влошени односи меѓу Вашингтон и Техеран, како и загриженост од наводното иранско збогатување на ураниум спротивно на меѓународните договори.
