Политичката партија Демократска обнова на Македонија (ДОМ) одлучи да ја прекине соработката со СДСМ и да продолжи со самостојно политичко делување. Одлуката е донесена на седница на Централниот одбор на партијата, на која биле усвоени три клучни насоки за идниот ангажман на ДОМ.
Како што соопштија од партијата, заминувањето од коалицијата претставува „принципиелен чекор за заштита на вредносниот интегритет на ДОМ“. Оттаму велат дека кога политичките процеси стануваат затворени и лишени од визија, потребна е нова, јасна и идеолошки доследна насока.
Во рамки на новата стратегија, ДОМ најавува настап на локалните избори без партнери од традиционалниот политички спектар. Наместо тоа, ќе се фокусира на соработка со граѓанскиот сектор, локалните заедници и индивидуи кои ги споделуваат вредностите за зелена, праведна и инклузивна политика.
„Коалициите се средство за остварување на заеднички вредности, но кога тие вредности се изгубени, неопходен е нов почеток. Затоа започнуваме со создавање на ‘Коалиција за зелена иднина’ – отворена платформа за поддршка на автентични локални кандидати од граѓаните за граѓаните“, соопштуваат од ДОМ.
Партијата ги обвинува „тивките коалициски партнери“ дека во два наврати гласаа за ограничување на граѓанското право на учество, со што беа исклучени независните кандидати од изборната трка. Тоа, како што посочуваат, е еден од клучните мотиви за напуштање на досегашната коалиција.
ДОМ упати и јавен повик до сите активисти, млади, студенти и граѓани кои се залагаат за еколошка, праведна и европска Македонија – да се вклучат во нивната нова политичка мисија.
Со овие потези, велат од партијата, се отвора политички простор за сите кои веруваат во доследна, вредносна и етичка политика.
