Голем скандал ја потресе кипарската полиција откако на социјалните мрежи се појави видео на кое, според првичните информации, се гледаат полициски службеници во интимен однос во службено возило, средe бел ден, на ливада во близина на градот Ларнака.
Полицијата ја потврди автентичноста на видеото и информираше дека вклучените лица се идентификувани и суспендирани. Според првичните наоди, едниот од нив бил на должност во моментот на настанот, додека другиот не.
„Ваквото однесување е целосно неприфатливо и го навредува трудот на илјадници полициски службеници кои чесно ја вршат својата работа“, изјави портпаролката на кипарската полиција, Кирикија Ламприаниду.
Инцидентот предизвика лавина коментари и потсмев на интернет, особено во време кога Кипар е во состојба на зголемена безбедносна подготвеност поради нестабилната ситуација на Блискиот Исток.
Полицијата најави дека ќе покрене и кривична и дисциплинска постапка против вклучените службеници, која би можела да вклучи обвинувања за занемарување на службената должност и непристојно однесување на јавен простор.
Покрај тоа, во тек е истрага за утврдување на идентитетот на лицето кое го снимило и објавило видеото, со цел да се провери дали е прекршена заштитата на лични податоци. Полицијата апелираше до граѓаните за воздржаност и чувствителност, особено имајќи предвид дека во случајот се инволвирани семејства и деца.
„Тој што го снимил видеото можел да го достави до надлежните органи, наместо да го објави на интернет“, порачаа од полицијата и додадоа: „Довербата на јавноста ни е најважна, и нема простор за компромис кога станува збор за етика и професионализам“.
