Под слоганот „Сѐ на свое место“, од четврток започнува одбележувањето на значајниот јубилеј – 70 години од постоењето на Општина Кисела Вода и Културното Лето, кои ќе бидат одбележани со богата и рекордно обемна програма на културни настани, со настапи на повеќе сцени, и учество на познати музички имиња и уметници.
Меѓу нив се истакнува Roger Sanchez – светска хаус ѕвезда и добитник на Греми награда, кој ќе настапи во Расадник, заедно со DJ Matz, DJ Ampov и DJ Деан Мицкоски, на вечерта што ќе го отвори културното лето. Публиката ќе има можност да ужива и во концертите на Каролина Гочева, Next Time, Слаткаристика, Два Бона, Теа Пејич Зајкова со бендот 2Exit, како и во настапите на Миле Кузмановски, Сузана Спасовска, Огнен Здравковски и Бојана Скендеровски. Програмата вклучува и стенд-ап настапи, семејни активности и детски изведби.
На денешната прес-конференција, покрај градоначалникот Орце Ѓорѓиевски, присуствуваа и дел од изведувачите, дуото Два Бона, поп ѕвездата Бојана Скендеровски, стенд-ап комичарот Бојан Велевски, зборуваше и Бобан Милошески од продукцијата Авалон, како и Миро Кацаров, еден од четврицата водители кои годинава ќе бидат дел од Културното лето – Сашко Коцев, актерката Драгана Левенска и водителката Верица Донев.
-Големо е моето задоволство што сме денес тука, на два дена пред почетокот на одбележувањето на еден значен јубилеј. Општина Кисела Вода одбележува 70 години од своето постоење, и тоа со програма која е разновидна, содржајна и квалитетна, креирана да допре до сите генерации. Во период кога стоиме на прагот на последната година од мојот мандат како градоначалник на Кисела Вода, зад нас оставаме време на темелна работа – во урбанизмот, инфраструктурата, образованието, спортот, социјалата и – секако, во културата и забавата. Од општина во која речиси и да немаше културен настан, Кисела Вода денес е синоним за масовност, квалитет и незаборавни вечери, со настани што собираат и до 30.000 посетители. Што би се рекло, СЕ’ НА СВОЕ МЕСТО. Оваа година не само што не е исклучок туку имаме рекорден број изведувачи кои ќе настапат на повеќе сцени и ќе понудат разновидна програма за сите возрасти, за сите жители на Кисела Вода и за сите Скопјани. Свечената седница на Советот и доделувањето на статуетки во форма на клучеви на заслужни жители на Кисела Вода, кои ќе се случуваат во четврток во утринските часови, се само вовед во богатата роденденска прослава.
Вечерта на 26 јуни, Расадник ќе биде домаќин на голем музички спектакл. Ќе настапат DJ Matz, DJ Ampov и Деан Мицкоски, а потоа – на сцената ќе се појави светската хаус ѕвезда Роџер Санчез, добитник на Греми, диџеј кој ги полни најголемите клубови и фестивали во светот. Горди сме што токму Кисела Вода ќе го слушне неговиот сет, и тоа бесплатно.
Останатиот дел од програмата е целосно посветен на поддршката на македонските уметници. Ова е дел од нашата определба – да им даваме простор на домашните уметници, не само како алтернативна опција, туку како основен избор. Затоа, и оваа година, како и во сите претходни, изборот на учесници е направен врз основа на квалитет, оригиналност и енергија, со која Кисела Вода успеа да се брендира како општина на културата, урбаната сцена и живата традиција.
Оваа програма уште еднаш потврдува дека Кисела Вода не гради само улици, училишта и инфраструктура – туку и заедништво, спомени и вредности што остануваат. И во културата, и во животот – сѐ е на свое место. А кога работите се на своето место, природно е да гледаме напред. Со искуство зад себе, со јасна визија пред себе. Верувајте, најдоброто допрва доаѓа – истакна градоначалникот Орце Ѓорѓиевски.
Програма за роденденската прослава и културното лето „Сѐ на свое место“:
26 јуни – Расадник
11:00 – Свечена седница, Дом на култура „Билјана Беличанец“
20:30 – DJ Matz
21:30 – DJ Ampov
DJ Деан Мицкоски
Roger Sanchez
27 јуни – Крст Драчево
20:30 – 21:00 – КУД „Китка“
21:00 – 22:30 –
Миле Кузмановски
Сузана Спасовска
Огнен Здравковски
Бојана Скендеровски
22:30 – 00:00 – Каролина Гочева
28 јуни – Расадник
20:30 – 21:30 – Next Time
21:30 – 00:00 – Два Бона и Слаткаристика
29 јуни – Парк „Македонија“ / Расадник
10:30 – 14:00 – Семеен ден, Парк „Македонија“
20:30 – Стенд-ап: Бојан Велевски и Марјан Ѓорѓиевски
21:30 – Теа Пејич Зајкова & 2Exit
