Откако американската армија ги погоди иранските нуклеарни постројки во операцијата „Midnight Hammer“, експертите предупредуваат дека оваа акција го разоткрила крајниот домет на американската воена моќ, но и сериозните слабости на руските воздушно-одбранбени системи.
Во анализа за британските медиуми, Хамиш де Бретон-Гордон – поранешен командант на Заедничкиот полк за хемиска, биолошка, радиолошка и нуклеарна одбрана на британската армија – вели дека Москва мора да биде длабоко вознемирена од случувањата.
„Израелските борбени авиони веќе извесно време слободно оперираат во иранскиот воздушен простор. А сега огромниот американски ударен пакет, вклучувајќи седум стелт бомбардери B-2, 75 крстосувачки ракети и други авиони, без никакви пречки стигна до целта и прецизно испорача 14 тешки бомби“, пишува тој.
Според него, овие удари се извршени без отпор од иранската ПВО која се потпира на руските системи С-300, руските борбени летала и воена доктрина од Москва – што сериозно ја доведува во прашање ефикасноста на руската одбрана.
Разликата меѓу Украина и Иран
Гордон појаснува дека воздушната ситуација над Украина е сосема различна – и двете страни се воздржуваат од испраќање авиони во воздушниот простор на противникот. Русија најчесто користи ракети и бомби со продолжен дострел, додека Украина возвраќа со беспилотни летала и ограничен број западни ракети со долг дострел.
„Операцијата на Израел против Иран покажа колку е можно успешно неутрализирање на непријателска ПВО – нешто што засега е недостижно за која било страна во Украина. Но, таа демонстрација е застрашувачка за Путин, особено што покажа колку се ранливи руските системи кога ќе се соочат со добро опремени западни сили.“
Иако Русија веќе користи понови С-400 и во одредени случаи најнови С-500 системи, адмиралот оценува дека С-500 најверојатно е повеќе мит отколку реалност, а С-400 е само подобрена верзија на претходниот модел.
Москва е свесна за својата ранливост
Гордон нагласува дека Кремљ е свесен за ризиците – иако, како што вели, рускиот врв не покажува голема загриженост за бројот на човечки жртви.
„Сведоци сме на повеќе од еден милион руски војници кои загинале или биле повредени во Украина, но Путин и неговите генерали се загрижени за сопствената безбедност. Операциите на израелските и американските разузнавачки служби во Иран, кои овозможуваат прецизно лоцирање и елиминација на водечки фигури, предизвикуваат страв и во Москва – особено што и Украина почнува да демонстрира слични способности на руска територија.“
Според него, операцијата „Spider’s Web“, во која неколкупати беше погодена руската стратешка воздушна флота, е јасен сигнал за тоа.
Американската надмоќ и можниот исход
Гордон заклучува дека демонстрацијата на американската сила ја покажува неоспорната надмоќ на САД над руските сили – и дека, доколку Доналд Трамп одлучи, може да го порази Путин и воено, или да ѝ ја предаде на Украина истата воена поддршка што ја доби Израел.
„Ако успехот во Иран биде искористен како дипломатски притисок, Трамп може да го натера Путин да седне на преговарачка маса. Доколку тоа се случи, можеби навистина ќе ја добие Нобеловата награда за мир – и тогаш навистина ќе ја има заслужено“, пишува адмиралот.
