Лавров: НАТО се обидува да се прошири надвор од својата зона на одговорност
Рускиот министер за надворешни работи, Сергеј Лавров, денеска го обвини НАТО дека ги надминува границите на својата традиционална сфера на одговорност, во обид да воспостави присуство во неколку чувствителни региони ширум светот.
„Алијансата настојува да се позиционира на Блискиот Исток, Јужен Кавказ, Централна Азија, Арктикот и во Индо-Пацифичкиот регион,“ изјави Лавров, додавајќи дека ваквите потези претставуваат загрижувачко проширување на нејзините геополитички амбиции.
Во врска со тензиите меѓу Иран и Израел, Лавров истакна дека досега не биле презентирани конкретни докази кои би ги потврдиле тврдењата дека Иран наводно подготвува напад врз Израел.
Во односите меѓу Москва и Вашингтон, шефот на руската дипломатија оцени дека процесот на нормализација е сложен и постепен.
„Воспоставувањето конструктивни односи меѓу Русија и Соединетите Американски Држави би било од значење за спречување на нови глобални кризи,“ изјави Лавров, пренесуваат агенциите РИА Новости и Танјуг.
