Балкан

Поранешниот сопруг го нарачал убиството на Андреа и Маријан: Еден детаљ им бил посебно сомнителен на инспекторите

Хрватската полиција уапси едно лице под сомнение дека стои зад нарачката на бруталното двојно убиство што се случи на 13 јуни во загрепската населба Маркушевац, каде животот го загубија Андреа К. (30) и нејзиниот партнер Маријан Ц.

Како што објави „Јутарњи лист“, уапсениот е Андреј Б., поранешен сопруг на убиената Андреа. Според полициски извори, тој се сомничи дека го организирал убиството од одмазда и лични мотиви.

Од почетокот на истрагата, истражителите се сомневале дека станува збор за нарачано дело, со оглед на тоа што не биле утврдени никакви лични, деловни или емотивни врски меѓу сторителите и жртвите. Единствената заедничка точка била токму Андреј Б., кој, како што се дознава, бил во пријателски односи со еден од осомничените убијци.

Според сознанијата на порталот „Индекс“, кратко пред убиствата, осомничениот нарачател бил виден на заедничка вечера со сторителите, што дополнително го зајакнало сомнежот на истражителите.

Како што неофицијално дознава истиот портал, Андреј Б. наводно ја обвинил Андреа дека не му дозволува да го гледа нивното дете. Токму тоа можело да биде главниот мотив за злосторот. Податоците упатуваат на тоа дека извесен Матја М. побарал од Франо Р. да му помогне во ликвидацијата на Андреа К., наводно на барање на нејзиниот поранешен сопруг.

Истрагата продолжува, а хрватската јавност со внимание го следи овој шокантен случај кој го потресе Загреб.

Балкан

Рама поддржува ограничување на правото на вето за новите членки на ЕУ

Албанскиот премиер Еди Рама оцени дека предложената идеја на Европската Унија за ограничување на правото на вето на новите членки на почетокот од нивното членство е „добра“. Предлогот има за цел да ги смири скептичните главни градови кон проширувањето на Унијата.

„Мислам дека е добра идеја“, изјави Рама за „Политико“ пред самитот ЕУ-Западен Балкан. Тој додаде дека несогласувањата во ЕУ се неизбежни, но дека пристапот на Албанија ќе се разликува од оној на Унгарија кога станува збор за блокирање на политиката на Унијата.

Рама потенцираше дека новите членки треба отворено да ги искажуваат своите ставови, но на крајот да се придржуваат кон колективните одлуки. Албанија се смета за еден од фаворитите за полноправно членство, со цел да стане членка на ЕУ до 2030 година.

Балкан

ЕУ ја укинува блокадата кон Косово: 205 милиони евра помош наскоро достапни

Европската Унија одлучи да ги укине сите санкции против Косово до крајот на јануари 2026 година, што ќе овозможи на земјата да добие 205 милиони евра помош на почетокот на новата година. Одлуката следи по мирната транзиција на локалната власт во северните општини со мнозинство Срби.

Санкциите, кои досега предизвикаа штета од над 613 милиони евра, се однесуваа на клучни сектори како животната средина, енергетиката, дигитализацијата и културата.

Претседателката на Косово, Вјоса Османи, преку социјалните мрежи изрази благодарност до лидерите на ЕУ и сите партнери на Косово за признавањето на посветеноста на земјата во овие процеси.

Балкан

Масовни дојави за бомби во училишта низ БиХ, учениците евакуирани

Утрово повеќе основни и средни училишта во Тузланскиот кантон во Босна и Херцеговина добија дојави за бомби, што доведе до прекин на наставата и итна евакуација на учениците и персоналот. Полициските екипи се на терен и преземаат мерки за проверка на заканите. Според неофицијални информации, пријавите главно биле испраќани преку електронски адреси.

Владата на Тузланскиот кантон и Министерството за образование и наука соопштија дека сите активности се спроведуваат во согласност со законските и безбедносните протоколи. „Училишните администрации и наставниот кадар дејствуваат одговорно, а безбедноста на учениците, наставниците и другите вработени е апсолутен приоритет“, велат од Владата. Учениците беа безбедно евакуирани и испратени во своите домови.

Покрај Тузла, дојави за бомби беа пријавени и во училишта во Република Српска, вклучувајќи градови како Бања Лука, Приједор, Прњавор, Лакташи, Требиње и Добој. Полицијата веднаш започна контрасаботажен преглед и обезбедување на објектите.