Комитетот за надворешни работи (АФЕТ) на Европскиот парламент денеска го усвои Извештајот за Северна Македонија за 2023 и 2024 година, подготвен од австрискиот европратеник и известувач за земјата, Томас Вајц.
По усвојувањето на документот, Вајц изрази задоволство што извештајот добил широка поддршка од различни политички групи во Европарламентот.
„Денеска го усвоивме првиот извештај за земјата на Северна Македонија од 2022 година во Комитетот за надворешни работи. Горд сум на целата напорна работа што беше вложена во наоѓањето компромиси за да можеме да го донесеме овој добро избалансиран извештај со широко политичко мнозинство. ЕУ мора да остане обединета со своите соседи во предизвикувачкиот геополитички пејзаж со кој се соочуваме. Северна Македонија припаѓа во ЕУ. По 20 години преговори, мора да го одржиме моменталниот добар моментум за понатамошно унапредување на процесот на проширување“, изјави Вајц, во соопштение испратено од прес-службата на Европскиот парламент.
Првично, гласањето за извештајот беше закажано за 4 јуни, но беше одложено на барање на Вајц поради притисоци од бугарски европратеници, кои изразија несогласување со јасното спомнување на македонскиот јазик и идентитет во документот. Тогаш Вајц изјави дека бил сведок на интензивни политички дебати, но оти цврсто стои зад извештајот, кој е резултат на преговори и компромиси во кои биле вклучени сите пратенички групи.
Во усвоениот извештај се нагласува потребата од задржување на моментумот и кредибилитетот на европскиот интеграциски процес. Се истакнува дека Северна Македонија и понатаму покажува посветеност кон ЕУ интеграцијата и усогласување со европските политики. Документот повикува на забрзување на преговорите за членство и на спроведување на уставните измени, при што се вклучени и неколку референци за признавање на македонскиот јазик и идентитет.
