Украинскиот претседател Володимир Зеленски во интервју за Sky News упати сериозни предупредувања до Западот, посочувајќи дека рускиот претседател Владимир Путин би можел да ја нападне некоја од земјите членки на НАТО во следните пет години, доколку не биде спречен сега. Зеленски ја опиша Украина како последната пречка меѓу Путин и остатокот од Европа.
„Верувам дека Путин би можел да нападне земја членка на НАТО во рок од пет години“, изјави Зеленски. „Денес Украина го спречува, нема време да ја тренира својата војска, а неговите војници гинат. Но, за десет години, тој ќе има нова војска – и ќе биде подготвен“.
Иако не очекува директен напад во наредните месеци, Зеленски предупреди дека руската стратегија вклучува добивање „пауза“ – време за обнова на армијата, укинување на санкциите и подготовка за нова фаза од агресијата.
Во критика на западните одбранбени политики, тој изрази незадоволство од планот НАТО-членките да ја зголемат воената потрошувачка на 5% од БДП до 2035 година. Според него, ова е премногу бавно, бидејќи Путин може да има зголемени капацитети веќе од 2030 година.
Зеленски беше остар и по прашањето на санкциите, укажувајќи дека Русија сè уште набавува компоненти за ракети и дронови, вклучително и од Велика Британија. „Тоа покажува дека системот не функционира како што треба“, истакна тој.
Во однос на американскиот претседател Доналд Трамп, Зеленски беше воздржан, но даде до знаење дека не верува во долгорочно партнерство меѓу САД и Русија. Тој се присети и на својот непријатен состанок со Трамп во Овалната соба, наведувајќи дека „постапил чесно“ и одбил да открие дали се чувствувал навреден или под притисок.
Иако призна дека можеби не е „најдобриот човек“ за време на војна, Зеленски потенцираше дека е „најискусниот“. За можните мировни преговори рече дека поддржува компромис, но јасно стави до знаење дека патот до мирот води преку санкции и воен притисок, а не преку отстапки.
