Американски Б-2 бомбардери со 37-часовен лет ги нападнаа иранските нуклеарни објекти – една од најдолгите мисии военото воздухопловство
Бомбардирачкиот напад на САД врз три клучни ирански нуклеарни објекти минатиот викенд се смета за еден од најголемите воздушни подвизи во поновата историја. Мисијата траела речиси 37 часа без прекин, објави CNN, и претставувала вистински тест за физичката и менталната издржливост на американските пилоти.
Во операцијата учествувале седум Б-2 бомбардери, секој со по два члена на екипажот, кои полетале од базата Вајтман во Мисури и прелетале половина од светот и назад. Оваа акција, опишана како „невиден подвиг“, вклучила повеќе од 125 различни летала – вклучително и борбени авиони, извидувачи и летала за воздушно полнење гориво.
Искуството на ветеран од вакви мисии
Пензионираниот полковник на американското воздухопловство, Мелвин Г. Диаил, кој учествувал во рекордна 44-часовна мисија над Авганистан во 2001 година, вели дека ваквите летови бараат екстремна концентрација и издржливост.
„Најимпресивно беше што седум авиони изведоа поединечни летови во интервал од само половина час. Тоа бара совршена координација“, вели тој.
Пилотите, поради должината на летот, се ротирале – едниот управувал, додека другиот одмарал на импровизирана лежалка зад седиштата. За да се одржи будноста, употребувале строго контролирани стимуланси одобрени од армиските лекари, а пред летот добивале и апчиња за спиење со цел да се подготват за долгиот напор.
Минимален комфор, максимална посветеност
И покрај технолошката софистицираност на бомбардерот Б-2, условите за човечкиот фактор биле исклучително ограничени. Тоалетот бил хемиски, резервиран само за итни случаи, а приватноста минимална.
„Приватност значеше дека колегата ќе се сврти на другата страна“, се шегува Диаил, додавајќи дека, иако сонот бил речиси невозможен на почетокот, со тек на време телото попуштало.
Оваа најнова мисија уште еднаш ја потврдува моќта на САД да изведува долги и прецизни интерконтинентални напади, но и огромниот човечки напор кој стои зад секоја таква операција.
