Балкан

Жена од Словенија почина откако ја каснал поскок – прв забележан случај по повеќе од три децении

Во Словенија е регистриран првиот смртен случај предизвикан од каснување од поскок по повеќе од три децении, јавуваат словенечките здравствени власти.

Како што пренесува хрватскиот портал „Дневник“, инцидентот се случил во понеделникот навечер кога 80-годишна жена била касната од змијата за раката.

– Раката ѝ отекла, а по околу 20 минути одење изгубила свест. Откако се освестила, почувствувала силна болка во стомакот – изјави Мирaн Брвар, раководител на Центарот за токсикологија и фармакологија при Универзитетскиот клинички центар во Љубљана, на итна прес-конференција.

Жената, според изјавите на лекарите, веќе имала проблеми со дишењето кога пристигнал медицинскиот тим. Состојбата ѝ се влошувала и покрај напорите за реанимација.

– Беше интубирана и подложена на вештачко дишење, но за жал, почина на пат кон болницата – додаде Брвар.

Според него, во последните 30 години во Словенија не бил регистриран ниту еден смртен случај како последица од каснување од поскок.

Пред одржувањето на прес-конференцијата, Брвар ја објави трагичната вест на платформата „Икс“ (поранешен Твитер), предупредувајќи:

„По неколку децении забележано е смртоносно каснување од поскок. Избегнувајте змии. Во случај на каснување, веднаш повикајте итна медицинска помош.“

Минатата есен, Словенија регистрира уште еден случај на каснување од поскок кога планинар беше каснат во регионот Ишки Винтгар. Тој беше хоспитализиран во УКЦ Љубљана, каде што неговата состојба брзо се подобри по примената на соодветен противотров.

Балкан

Пијан возач фатен со 200 км/ч

Припадници на Министерството за внатрешни работи на Србија денес околу 14 часот го запреа Д.В. (39) во Лозница, кој управуваше возило „суди“ со брзина од 200,8 километри на час на дел од патот Лозница – Шабац, каде што ограничувањето е 100 км/ч.

Со алкотестирање е утврдено дека возачот бил во тешка алкохолна интоксикација, со 1,41 промили алкохол во крвта.

Возачот веднаш бил исклучен од сообраќај и задржан во службените простории, а против него е поднесена прекршочна пријава за насилно возење и возење под дејство на алкохол.

Балкан

Вучиќ: Србија има гориво до 15 јануари

Српскиот претседател Александар Вучиќ увери дека Србија има обезбедено доволно керозин, мазут, дизел и бензин најмалку до 15 јануари, а можеби и до 25 јануари, обидувајќи се да ги смири граѓаните по информациите за проблеми во нафтената индустрија.

Иако државата веќе 70 дена функционира без увоз на нафта, Вучиќ истакна дека енергетскиот систем е стабилен и дека нема причина за паника пред претстојните празници. Тој сепак призна дека ситуацијата е комплицирана, особено поради статусот на Нафтната Индустрија Србија (НИС), за што Белград следната недела ќе испрати итни барања до американската канцеларија за контрола на странски средства (ОФАК) за добивање оперативна лиценца.

„Доволно керозин, мазут, дизел и бензин обезбедивме најмалку до 15 јануари, можеби и до 25 јануари. Никој не треба да се грижи, имаме безброј технички проблеми, но државата знае како да ги реши“, рече Вучиќ.

Претседателот потенцираше дека Србија нема да дозволи колапс на енергетскиот сектор и им се заблагодари на граѓаните за поддршката. „Ве уверувам дека ќе имате доволно од сè што е потребно за празниците. Ќе добивате навремени информации за секоја промена“, додаде тој.

Балкан

Тешка несреќа на Дурмитор: Турист загина по пад од жичара, жена тешко повредена

Трагичен инцидент се случи денеска на ски-центарот Савин Кук на Дурмитор, кога две лица – странски туристи – паднале од корпа на ски-лифт, при што едно лице го загуби животот, а друго се здоби со тешки повреди.

Несреќата се случила на жичара број два, во стрмниот втор дел од трасата што води кон Савин Кук. Според првичните информации, загинал маж, додека повредената жена е во свесна состојба и комуникативна.

На терен се ангажирани спасувачки и надлежни служби, кои вршат увид и ја утврдуваат причината за инцидентот. Првичните сознанија укажуваат на можен технички дефект во вториот дел од жичарата, по што корпата во која се наоѓале туристите започнала да се движи наназад.