Бродот Morning Midas, натоварен со илјадници возила, потона во Тихиот Океан три недели по избувнувањето на пожар на неговата палуба, соопштија американските власти.
Инцидентот се случил околу 667 километри оддалечено од брегот на Алјаска. Бродот, долг околу 180 метри, бил управуван од компанијата Zodiac Maritime и носел повеќе од 2.700 возила – меѓу нив 70 електрични, 681 хибрид и над 2.000 конвенционални модели. Компанијата потврди дека ниеден дел од товарот не бил спасен пред потонувањето.
На бродот имало и над 1.800 метрички тони гориво, што отвора потенцијален ризик од истекување на нафта. Сепак, американската крајбрежна стража информираше дека засега нема видливи знаци на загадување. На местото на потонувањето остануваат два спасувачки влекачи за да го надгледуваат подрачјето, а дополнителен брод е испратен со цел заштита на морската средина.
Сите 22 членови на екипажот биле успешно евакуирани преку спасувачки чамец и префрлени на комерцијален брод недолго по избувнувањето на пожарот на 3 јуни. Инцидентот се случил на околу 1.930 километри оддалеченост од градот Анкориџ.
Според изјавата на Zodiac Maritime, пожарот започнал на палубата каде биле сместени електричните возила, при што екипажот безуспешно се обидувал да го стави под контрола, по што испратил повик за помош. Противпожарни и спасувачки бродови пристигнале дури по една недела, но во меѓувреме огнот сам се изгаснал. Сепак, оштетувањата и неповолните временски услови довеле до потонување на бродот.
Бродот пловел под либериско знаме и бил на релација од Кина кон Мексико. Либерија ќе спроведе официјална истрага за причините за несреќата, а Zodiac Maritime ќе отвори посебна внатрешна истрага.
Иако вниманието е насочено кон електричните возила, кои користат литион-јонски батерии познати по ризикот од прегревање и пожари, и Zodiac Maritime и американската крајбрежна стража изјавија дека е прерано за заклучоци дали токму тие го предизвикале пожарот.
