Најмалку шест лица го загубија животот, а повеќе од 80.000 луѓе беа евакуирани поради катастрофалните поплави што го погодија округот Ронгџианг во југозападната кинеска провинција Гуиџоу, соопштија локалните власти задолжени за управување со поплави.
Според државната агенција Синхуа, станува збор за најразорните поплави во регионот во изминатите 50 години. Обилните врнежи предизвикале нагло надоаѓање на реките, при што во еден момент протокот на вода достигнал речиси 11.400 кубни метри во секунда, носејќи сè пред себе.
Огромна штета и прекин на сообраќајот
Водата ги преплавила ниските делови на теренот, причинувајќи сериозни оштетувања на инфраструктурата, блокирање на патиштата, нарушување на комуникациските линии и изолација на делови од населението. Само во Ронгџианг биле евакуирани околу 48.900 лица, додека во соседниот Конгџианг биле преместени уште 32.000 жители.
Итни служби на терен
Екипите за вонредни состојби работат интензивно на изградба на привремени насипи, испумпување на водата, дезинфекција на погодените подрачја, превенција од заразни болести, како и потрага по преживеани.
Закана од свлечишта и во други региони
Во покраината Санду, поројните дождови предизвикаа свлечиште кое доведе до делумно рушење на мост на автопат. Засега нема извештаи за повредени. Поплавите ги зафатија и делови од регионот Гуангси, додека земјата сè уште се опоравува од претходната елементарна непогода што ја погоди провинцијата Хунан.
Кинеските власти изминатата недела издадоа црвено предупредување за опасност од планински надоаѓања и свлечишта во шест провинции, предупредувајќи на зголемен ризик од нови катастрофални настани.
