Украина и Русија денеска реализираа нова размена на воени заробеници, како дел од договорот постигнат на разговорите во Истанбул на почетокот од месецов.
„Денеска се враќаат борци од армијата, Националната гарда и граничната служба“, објави украинскиот претседател Володимир Зеленски на „Телеграм“, споделувајќи и емотивна видео-снимка од пристигнувањето на ослободените војници. Тој не прецизираше колку украински државјани се вратиле дома, но додаде дека повеќето биле во рускo заробеништво од 2022 година, кога започна целосната руска инвазија.
Руското Министерство за одбрана исто така ја потврди размената, без да наведе точна бројка на ослободени лица. Според нивното соопштение, размената била спроведена на границата меѓу Белорусија и Украина.
Договорот од Истанбул, постигнат на почетокот на јуни, предвидува размена на заробеници под 25-годишна возраст, како и на тешко болни и ранети лица. Оттогаш, двете страни спроведоа вкупно седум вакви операции.
Рускиот претседател Владимир Путин неодамна изјави дека досега се разменети над 900 заробеници од двете страни.
Украина се брани од руската воена агресија од февруари 2022 година.
