Во своето прво јавно обраќање по постигнувањето на примирјето меѓу Иран и Израел, кое беше постигнато со посредство на САД, врховниот ирански лидер, ајатолахот Али Хамнеи, изјави дека Исламската Република „ѝ удри тежок шамар на Америка“ и ѝ нанела штета на една од нејзините стратешки воени бази во регионот.
Во порака објавена на социјалната мрежа Х (поранешен Твитер), Хамнеи оцени дека Вашингтон не постигнал никакви резултати со вклучувањето во вооружениот судир на страната на Израел.
„Американскиот режим директно се вклучи во војната бидејќи процени дека, доколку тоа не го стори, ционистичкиот режим ќе биде целосно уништен. Тие влегоа во конфликтот за да го спасат – но не постигнаа ништо“, изјави Хамнеи, пренесува британскиот „Гардијан“.
Врховниот лидер потврди дека иранската страна извела одмазднички напад врз американската воздухопловна база „Ал Удеид“ во Катар, опишувајќи ја акцијата како „значаен одговор“ на американските воздушни напади врз иранските нуклеарни постројки претходниот викенд.
Вашингтон го минимизира инцидентот
Aмериканскиот претседател Доналд Трамп го омаловажи иранскиот напад, нарекувајќи го „многу слаб“, и нагласи дека 13 од вкупно 14 проектили биле успешно пресретнати од противвоздушната одбрана.
Катаркото Министерство за надворешни работи потврди дека ракетите биле пресретнати и дека во нападот не се евидентирани жртви или сериозна материјална штета. Портпаролот Маджед ал-Ансари изјави дека системите за одбрана на земјата реагирале навремено и ефикасно.
Хамнеи со нови закани кон американските позиции
Ајатолахот Хамнеи упати и ново предупредување до САД, посочувајќи дека Иран има способност повторно да ги нападне американските воени бази во регионот доколку тоа го смета за неопходно.
„Исламската Република има пристап до клучните американски центри во регионот и може да реагира кога и да процени дека е потребно. Таквите акции може да се повторат. Доколку дојде до нова агресија, непријателот ќе плати висока цена“, порача тој.
Изјавата на Хамнеи доаѓа во период на привремено затишје во тензиите меѓу Иран и Израел, додека Вашингтон и понатаму се обидува дипломатски да ја стабилизира ситуацијата на Блискиот Исток.
